لیکوال:مسعود آرین
زه چې کله د ولسمشر اشرف غني خبرې واورم نو د عقل په قدر پوه شم او سمدلاسه پرې شکرونه وباسم چې الحمدلله الله تعالی د عقل او فکر په نعمت نازولی یم
زما په ګمان چې اوس هم څوک په هغه څو بربنډو حقایقو سترګي پټوي چې د هغه د وضاحت لپاره دلیل راوړل یو سادتوب بلل کیږي یو ستر حماقت دی لکه د طالب په حقانیت اعتراف نه کول ما ته د هغه چا په اړه دا تصور راکوي چې دا کس له عقله لرې پروت دی او د خپل ژوند قیمتي وخت د ناپوهۍ او جهل په تورتمونو کې تیروي
زه طالب نه یم او نه دا وایم چې د طالب په صف کې به کمزوري نه وي خامخا به وي ځکه دا د انسانانو یوه ټولۍ ده ضرور به ترې څه ناڅه غلطي صادریږي البتة د طالب صف عموماً باطل ګڼل او د دوی داعیه ناحقه ګڼل بیا یوه له عقله لرې پریکړه بولم
په افغانستان د طالبانو د واکمنۍ پر مهال د امریکې لخوا د طالبانو پر حکومت له برید کولو وروسته وینو چې له هغه وخته بیا تر دې ننه د امریکا په مشرۍ د ۴۲ هیوادونو فوځونو له راز هڅو سره سره دا ډله ختمه نکړه، بلکې د تیر وخت په نسبت دا ډله نوره هم مطرح شوه،جنګیالي یې زیات شول او ورځ تر بلې زیاتیږي،هره ورځ د هیواد زیاتې ځمکې تر خپل کنټرول لاندې راولي او پرمختګ کوي
مالومه خبره ده چې دلته یو څه راز پروت دی،دا هسې په لاس جوړه شوې خبره نه ده او نه هم د یوې کوټې د مجلس حاصل دی چې منځ ته راغلی دی
زوریږم په دې چې دلته لا داسې خلک سته چې اوس هم د طالبانو په اړه ماشومانه او له عقله لرې پریکړې کوي او په یو داسې حقیقت سترګې پټوي چې په هغه سترګې پټول ښکاره له لمر څخه انکار دی
زموږ او تاسو ولسمشر اوس هم ډیر زیات له خولې تیریږي کله وایي که طالبان جنګ پرینږدي د تروریزم په نړۍ وال لیست کې به شامل شي،کله به بیا وایي چې د طالبانو لپاره دا آخري فرصت دی کنه نو داسې او داسې به وکړم
زه حیران دیته یم چې اشرف غني هم کله دا فکر کړی چې د طالبانو دا ډله ولې ورځ تر بلې زیاتیږي؟
ولسي ملاتړ ولې له ځانه سره پیدا کوي ؟
ولې د هیواد زیاتې برخې د دوی په لاس کې دي؟
د دوی په وړاندې د دومره سترو قوتونو زور ازمویل ولې دا ډله کمزورې نکړه؟
او دا فکر یې کړی چې زه ولې داسې خبرې کوم؟
ما ته چې د ولسمشر په نسبت ماشوم هم ویلای شئ په دې ټولو شیانو پوه سوی یم چې قصه داسې ده نو بیا ولې رموږ ولسمشر اوس داسې څه ته مټې رابډ وهلي چې د هغه کول د عقل له مخې ناشونې او نا ممکنه ده؟
