(کابل ټکی کام ۱۳۹۶زمری ۵)
د بدخشان ولايت په تګاب ولسوالۍ کې وسله والو طالبانو د دولتي ځواکونو په مرکزونو او پوستو بریدونه کړي، چې له کبله يې عسکرو ته مرګ ژوبله اوښتې او طالبان د پنځلس پوليسو د نيولو ادعا کوي.
د طالبانو وياند ذبيح الله مجاهد کابل ټکی کام ته په رالېږلې خبرپاڼه کې ويلي، چې د دوی پلويانو د تګاب ولسوالۍ دفاعي کمربند مات کړی او لسګونو دولتي سرتيرو ته د مرګ ژوبلې ور اړولو سربيره يې پنځلس تنه عسکر ژوندي هم نيولي دي.
نوموړی زياتوي، په دغه جګړه کې د دوی ځواکونو ته درې ټانګونه، یو رينجر موټر څلور ميله سپکه او درنه وسله او په زياته اندازه پوځي توکي او مهمات هم لاسته ورغلي دي.
چارواکي دغه بریدونه تائيدوي او وايي، چې پرون سهار مهال ناوخته طالبانو د تګاب ولسوالۍ پر کتوبالا، ګوري او خمبک سيمو بريدونه وکړل.
په شمال ختيځ زون کې د ملي اردو د شلمې فرقې د مطبوعاتو مسئول غلام حضرت کريمي رسنيو ته ويلي، چې وسله والو طالبانو تېره ورځ د ملي اردو په يوه قرارګاه بريدونه پيل کړل چې تر نن سهاره يې دوام وکړ.
نوموړی وايي، په دغه جګړه کې وسله والو طالبانو ته مرګ ژوبله اوښتې خو خپل لور ته يې د تلفاتو په اړه څرګندونې نه دي کړي.
دا په داسې حال کې ده، چې شاوخوا يوه اوونۍ مخکې وسله والو طالبانو له يمګان ولسوالۍ نه په شا شوي ۳۵ محلي پوليس په تګاب ولسوالۍ له کلابندۍ وروسته ووژل.
بايد وويل شي، چې د بدخشان ولايت یمګان او وردوج ولسوالۍ مکملې د طالبانو په لاس کې دي او د پاتې نورو ولسواليو ډيری سيمو باندې هم طالبان حاکميت لري.
-الماس خدرخېل-
