(کابل ټکی کام ۱۳۹۶زمری ۷)
په فلسطين کې د تازه لاريونونو په ترڅ کې اسرائيلي يهودي عسکرو دوه فلسطينيان شهيدان کړي او له دوو سوو څخه زيات يې ټپيان کړي دي.
د ايران د ايرنا خبري اژانس د راپور له مخې، اسرائيلي عسکرو تېره ورځ د جمعې له لمانځه وروسته په هغه لاريون کوونکو ډزې وکړې، چې په قدس، لويديځې غاړې او غزې تړانګه کې د مسجد الاقصی په ننګه راوتلي و.
راپور زياتوي، چې یهودي عسکرو د غزې تړانګې د البريج او جباليا سيمو ته څېرمه په راوتليو لاريوونکونکو ډزې وکړې، چې په ترڅ کې يې د عبدالرحمن ابوهمیسه په نوم يو تن ۱۶ کلن فلسطينی ووژل شوی او شپږ تنه نور ټپيان شول.
دغه راز د اردن سيند د لويديځې غاړې په ځينو سيمو کې لاريونونه وشول، چې هلته هم اسرائيلي عسکرو په لاريونکوونکو ډزې وکړې او د يو تن په وژل کېدو سربېره ۲۲۵ تنه ټپيان شول.
په فلسطين کې د روانې مياشتې له څوارلسمې نېټې راوروسته تاوتریخوالی زيات شوی، چې له امله يې لسګونه کسانو ته مرګ ژوبله رسېدلې ده.
له تېرو درې اوونيو راپديخوا اسرائيلي عسکرو پر مسلمانانو مسجد اقصی کې د جمعې د لمانځه پر ادا کولو بنديز لګولی و او د دغه مسجد په دروازو کې يې الکترونيکي کشفي الات نصب کړي و، چې د مسلمانانو د سخت غبرګون سره مخ شول.
د چهارشنبې په ورځ په مسجد اقصی کې اسرائيلي عسکرو ټول لګول شوي بنديزونه لغوه کړل او کشفي الات يې لرې کړل، خو تېره ورځ يې يوځل بيا هغه کسانو ته مسجد اقصی ته د ننوتلو اجازه ورنکړه چې عمرونه يې له پنځوس کلونو کم و او عام مسلمانان يې په دغه مسجد کې د لمانځه له ادا کولو منع کړل.
دا په داسې حال کې ده، چې د مسجد اقصی خطيب الشيخ عکرمه صبري عربي رسنيو سره په تازه مرکه کې ويلي، چې تر هغې به د اسرائيلو پر ضد خپله مبارزه جاري ساتي، ترڅو چې پر دغه مسجد يوځل بيا مسلمانان حاکم شوي نه وي او په خبره يې چې په مسجد اقصی د مسلمانانو په نورو چارو کې د اسرائيلو د لاسوهنې مخينوی به کوي.
-الماس خدرخېل-
