(کابل ټکی کام ۱۳۹۶زمری ۱۰)
شمالي کوريا يوځل بيا امريکا ته ګواښ کړی او ويلي يې دي، چې ترڅو امريکا له شمالي کوريا بخښنه نه وي غوښتي دوی به د نويو بالستيک توغنديو ازميښتونو ته دوام ورکوي.
د شمالي کوريا د کارګر ګوند له لوري په خپره شوې رسمي دولتي ورځپاڼه کې راغلي، چې تر هغې امريکا د دغه هېواد پر وړاندې له دښمنيو له ډک سياست څخه لاس نه وي اخيستی او له دوی يې بخښنه نه وي غوښتي، ترهغې به شمالي کوريا د اتومي بالستيک توغنديو ازميښتونو دوام ورکوي.
ورځپاڼې د شمالي کوريا د هواسونګ ۱۴ په نوم له لويو وچو تېريدونکی وروستی توغندی بريالی بللی دی.
ورځپاڼې ليکلي، ترڅو چې امريکايي امپرياليستان د شمالي کوريا پرضد کړنې ترسره کوي او له دښمنيو ډک سياست نه لاس په سر نه شي، له شمالي کوريا يې په (ګونډو بخښنه نه وي غوښتي) نو دغه هېواد به خپل د اتومي او بالستيک توغنديو ازميښتونودوام ورکوي او په امريکا د بريد کولو لپاره له چمتووالي به لاس وانخلي.
دا په داسې حال کې ده، چې د شمالي کوريا رسمي اژانس ويلی چې د دوی هېواد غواړي د اتومي او بالستيکي توغنديو په ازميښتونو سره د امريکا سياست ته تغير ورکړي.
د يادونې ده، چې د شمالي کوریا ولسمشر کیم جونګ اون د هواسونګ ۱۴ وروستي توغندي د ازميښت پر مهال وويل، چې دې ازموینې وښوده چې د امریکا ټوله خاوره زمونږ د توغندیو تر پوښښ لاندې ده.
-الماس خدرخېل-
