(کابل ټکی کام ۱۳۹۶ وږی ۱۹ فرید افغان)
کابل نیوز د یوې موثقې سرچینې په استناد خبر ورکړی چې امریکایانو بالاخره عطانور ته سره کرښه ټاکلې چې که د بلخ د ولایت کرسۍ ورته اهمیت لري نو له مرکزي حکومت سره دې جوړجاړی وکړي، کنه نو دخپلې دندې نه به وشړل شي.
سرچینې وایي چې امریکايان هغه مهال دې خبرداري ته اړ شول کله چې د ارګ او عطانور ترمنځ اختلافات زیات شول.
تیره میاشت د عطانور، دوستم او محقق په مشرتابه د نجات ملي په نامه شورا داسې مهال رامنځته شوه چې د ولسمشر غني له خوا د امریکایانو په مستقیم دخالت دوستم ترکیې ته تبعید شو، د عطانور واکونه محدود شول، او احمدضیا مسعود له دندې وشړل شو .
یادې شورا ارګ په خپلسریو او د واک په انحصار تورن کړ، او همداراز یې د لمړي معاون دوستم دحقوقو د اعادې غوښتنه کوله.
غني او ټیم یې د شورا ددانحلال بې دریغه هڅې وکړې خو ګټه یې ونکړه بالاخره اړ شول چې د دې زورواکي قضیې اصلي لوری چې امریکایان دي مخامخ له عطا نور څخه د مخالفتونو د اختتام غوښتنه وکړي او هغه ته د نه اطاعت په بدیل کې له دندې د شړل کیدو ګواښ وکړي.
ګلبدین حکمتیار هم له ولسمشر سره په خپله وروستۍ لیدنه کې د بلخ په اړه د اشرف غني د نويو پلانونو ملاتړ او هرکلی کړی دی.
د چارو د څارونکو په آند د امریکایانو له دې ګوت څنډنې دوه خبرې را معلومیږي لمړی داچې د بلخ د والي هغه اقرار سپین حقیقت وچې ویلي یې ول “ امریکایانو د پیپسي د بوتلونو په څیر وکارول او بیا یې هسې واچول“
او بل داچې د شمال ټلوالې انحلال چې له یوې خوایي اجرایه رئیس او د بلخ والي سره مخالف کړل او له بل لوري یې ځینې نور له صحنې و ایستل د اشرف غني نه، بلکه د امریکایانو مستقیم دخالت و.
