(کابل ټکی کام ۱۳۹۶وږی ۱۹): د نیويارک ټايمز ورځپاڼې د شهید اونۍ يا د مسعود د تيرې ورځې د تلين په اړه په يو مطلب کې ليکلي، چې پرون ورځ ظاهرا د حکومت د کنټرول څرک نه لیدل کېده او زياتوي چې په دې ورځ کابل ويشل شوی و.
پرون په کابل ښار کې د مسعود پلويانو د هغه د وژنې تلين په داسې حال کې ولمانځه چې د دغه ښار ډیری اوسېدونکي يې په ويره او ډار کې اچولي و، د لاريون کوونکو د ډزو او د هغوی د موټرو د کتارونو د بې احتياطۍ له ويرې خلک له خپلو کورونو په ډاډه زړه بهر نه شول راوتلی.
نيويارک ټايمز ليکلي، چې د پروني تلین د ګډونوالو په پرتله دولتي پولیس په وسله او شمېر کې کم ښکاریدل او په خبره يې چې په دې ورځ د حکومت کنترول نه و.
که څه هم وړمه ورځ د کابل ګارنيزيون قومندانۍ خبرداری ورکړی و، چې د مسعود پلويان دې له ځان سره وسلې او نظامي دولتي وسايط نه انتقالوي، خو بيا هم يادې ورځپاڼې د روغتيايي چارواکو له خولې ليکلي، چې په کابل ښار کې د پرونيو ګډوډيو او هوايي ډزو له امله پنځه تنه ټپيان شوي دي او ډیری لاريونوال په وسلو سمبال و.
ورځپاڼه دغه راز زیاتوي د احمد شاه مسعود د تلین په شپه هم د تلین د ګډونوالو په موټر درې ماشومان وهل شوي وو.
هر کال د احمد شاه مسعود پلويان په کابل ښار کې د هغه د مړينې تلين په مارشونو، په ډزو او اخ وډب لمانځي چې تر ډیره پکې ملکي خلکو ته مالي او ځاني زيانونه اوړي.
