مزارشريف کې د سره صلیب يوه بهرنۍ ډاکټره وژل شوې
(کابل ټکی کام ۱۳۹۶وږی ۲۰): د بلخ ولايت په مرکز مزارشريف ښار کې د سره صليب نړيوالې ادارې يوه بهرنۍ ډاکټره د يوه وسله وال کس له لوري وژل شوې ده.
د دغه ولايت د امنيې قوماندانۍ وياند شېرجان دراني رسنيو ته ويلي، چې د سره صليب نوموړې ډاکټره نن له غرمې مخکې د يو معيوب کس له لوري د يوولس بجو په شاوخوا کې وژل شوې ده.
هغه وايي، چې يو معيوب تن د دغه ډاکټرې دفتر ته له وسلې سره ورغلی و او پر هغې يې په نوموړي دفتر کې ډزې کړي، چې ځای پرځای پکې وژل شوې ده.
هغه زياته کړه، چې د يادې ډاکټرې قاتل يې نيولی او د پلټنو لاندې دی.
په مزارشريف کې يوې باوري سرچينې رسنيو ته ويلي، چې ياده ډاکټره د فرانسې هېواد تبع وه.
تر اوسه د پېښې انګيزه نه ده معلومه چې نوموړي کس ولې دغه ډاکټره وژلې ده.
په افغانستان کې د سره صليب ادارې هم تر دې دمه په دې اړه رسنيو ته څه نه دي ويلي.
