هند د افغان سوداګرو د تازه ميوو موټرو ته د تګ اجازه نه ورکوي
(کابل ټکی کام ۱۳۹۶وږی ۲۷): د ورکړل شويو راپورونو پر اساس له تېرو شپږو ورځو راهيسې په واګه بندر کې د افغان سوداګرو د تازه ميوو موټرونه ولاړ دي او هغې غاړې ته د تګ اجازه نه ورکول کېږي.
افغان سوداګر وايي، چې له تېرې يوې اوونۍ راهيسې د نامعلوم علت له امله اخوا ته د موټرو د اوښتو اجازه نه ورکول کېږي او په وينا يې چې تر اوسه شل ټنه خټکي او تازه ميوې خرابې شوي دي.
دوی زياتوي، که چيرې د لارې بندېدل همداسې دوام پيدا کړي نو هلته په موټرو کې نورې ميوې به هم دخرابېدو له ګواښ سره مخ شي.
د افغانستان د متشبیثینو عالي بورډ مشر رحم الدين حاجي اغا، په کابل کې د هند له سفارته د يادې ستونزې د هواري غوښتنه وکړه.
واګه د هند او پاکستان ترمنځ بندر دی چې تر ډېره افغان سوداګر له همدغې لارې، تازه مېوې او نور سوداګرېز توکي هند ته صادروي.
