افغانستان چې درې لسيزې جګړو وځاپه او په څلورمه لسيزه کې هم د افغانستان ولس د تباهيو لپاره دجګړو دوام پای ته نه دی رسيدلی. د يوې جګړې د پای ته رسيدو سره سم د بلې جګړې د پېل پروګرام او پلان جوړ کړل شي. امريکا چې دافغانستان او دافغان ولس د د ښمنانو په سرکې لومړی نوم لري، په افغان ولس يې تل جګړه تپلې او خپله ګټه يې ترلاسه کړې. د جګړې اور يې په افغانستان کې بل ساتلی او چې کومه ناکامي منځ ته راغلې هغه يې افغان ولس ته راجع کړې ده . چې مونږ د کمونيستي نظام را وروسته خپل منځيو او ياد جهاد په دوران کې د جهادي ګوندونو ترمنځ د جګړو بېلګې لرو . امريکا لکه څرنګه چې يې په افغانستان کې خپلې نوې جوړې کړې وسلې وازمايلې دارنګه يې خپل جوړ کړي پلانونه چې دافغان ولس د تباهيو لپاره يې پکار اچولي ورځ په ورځ ازمايي ؛ کله په يوه او کله په بله نامه . افغانان سره په خپلو کې په جګړو اخته کوي او د وسلې فابريکې پرې چارې ساتي. که په افغانستان او يا نوره اسلامي نړۍ کې جګړې بندې شي د امريکا جنګي فابريکې چې ډول ډول وسلې پکې جوړوي په ځای به ولاړې وي خو متأسفانه چې افغانان يې په خوب ويده ګير کړي دي، کلونه کلونه يې افغانان دکمونيست او مجاهد په نامه ووژل او دا دی اوس همغه کمونيستان او مجاهدين په يوه پارلمان ، يوه اداره او يوه مجلس کې سره ناست وي. کلونه کلونه يې مجاهدين په خپل منځي جګړو کې سره وجنګول . کابل ښار کې يې دهرې جهادي جبهې نيول شوی ملکيت وګرځاوه . کومه برخه به چې دکوم جهادي ګوند وسله والو سره وه ، دهغې سېمې بادشاهي به ورسره وه . اوس هغه جهادي مشران اوکشران په خپلو کې دولتي چوکۍ سره تقسيموي. ديوې عقيدې ، يوه کلي کور او يوه کلتور ورڼه طالبان او مجاهدين چې ټول طالبان مجاهدين دي په بېلو بېلو نومنو يې سره وويشل. د نورو ناکاميو ترڅنګ يې دطالبانو په مقابل کې مليشې او اربکيان راپيداکړل چې دمليشو او اربکيانو تر ناکاميو وروسته اوس غواړي د طالبانو په مقابل کې د جهاد دورې مجاهدين چې دکابل دولت سره به دولتي چوکاټ کې يې دامريکا اوامرو ته سرونه ټيت کړي دي، يو ځل بيا د طالبانو په مقابل کې د پوځ په شکل وجنګوي.
تېره ورځ چې دلته په مرکز کې دامريکا د کانګرس د مجلس پلاوي کومه غونډه او ناسته د اشرف غني سره وکړه چې د مليشو پرځای دې دجهادي ګوندونو اړوند مجاهدين د دولتي امنيتي چارواکو سره يو ځای د طالبانو په مقابل کې مقاومت ته ودرول شي. د دې غرض همدا دی چې دا جګړه به بيا له ولاياتو څخه د کابل مرکز ته را ورسوي او دا چې په کابل کې يو څه نوې او يا ترميم شوې ودانۍ به بيا په کنډوالو بدلې کړي چې په اصل کې يو ځل بيا دخپلمنځيو جګړو هڅې دي.
