(کابل ټکی کام ۱۳۹۶ لړم ۱۴ فرید افغان)
راپورونه وایي چې تیره شپه د لوګر ولایت برکي برک ولسوالۍ دشامزارحوزې اړوند اخوندبابا پرکلي باندې امریکایي ځواکونو عملیات پیل کړل.
په عملیاتو کې د امریکایانو په ګډون لسګونه افغان کمانډو ځواکونو هم برخه اخیستې وه.
د خبر پر اساس؛ عملیات د طالبانو له سخت غبرګون سره مخ شول چې د سختې نښتې له کبله یو شمیر افغان او امریکایي ځواکونو ته مرګ ژوبله اوښتې ده.
امریکایانو په یاده جګړه کې د خپل یوه سرتیري د وژلو پخلی کړی، خو طالب ویاند ذبیح الله مجاهد رسنیو ته په استول شوې پاڼه کې ادعا کړې چې؛ په یاده څو ساعتیزه نښته کې یې د یوه افسر په ګډون ۵ تنه امریکایي ځواکونه وژلي دي.
طالبانو همداراز ویلي چې په یاده جګړه کې ۹ تنه افغان کمانډو ځواکونه هم وژل شوي دي.
طالب ویاند خپل لوري ته هم د تلفاتو اوښتل منلي او په وینا یې چې په دې جګړه کې دوه تنه طالبان هم وژل شوي دي.
دا پداسې حال کې ده چې څو ورځې وړاندې هم د دې ولایت په خروار ولسوالۍ کې د یوې څرخکې د لویدو له امله تر ۴۰ ډیرو کورنیو او بهرنیو ځواکونو ته مرګ ژوبله اوښتې وه.
امریکایانو هغه مهال هم د خپل یوه عسکر د وژلو او ۶ نورو د ټپي کیدو خبر ورکړی و.
پدې وروستیو کې د امریکایانو پرضد دطالبانو حملو زور اخیستی .امریکایان دخپلې نوې پالیسي ترمخه نشي کولی د خپلو سرتیرو د تلفاتو خبر تر هغو رسنیز کړي ترڅو یې کورنۍ او اقارب ورباندې نه وي خبر کړي.
طالبان وایي امریکایان د خپلو تلفاتو ریښتنې شمیرې له دې کبله پټوي چې د خپلو نورو ځواکونو پر مرال منفي اغیزه ونه کړي
