تخار: روغتون ته ځانګړي شوي یو نیم میلون دالر پیسې غلا شوې
(کابل ټکی کام ۱۳۹۶ لړم ۱۶ فرید افغان)
د بهرنیانو د پراخو مالي مرستو او د هغو د چورتالان لړۍ لا هم ګرمه روانه ده، تازه خبرونه وایي چې د تخار ولایت د روغتون د جوړولو او پرسونل لپاره ځانګړي شوي یو نیم میلون دالر حیف ومیل شوي دي.
د تخار د عامې روغتیا رییس حفیظالله صافی وايي چې دا پروژه د عامې روغتیا وزارت لهخوا د ۹ میلیونو امریکايي ډالرو په ارزښت لاسلیک شوې او د تخار د عامې روغتیا ریاست يې یوازې د څار او پليکولو دنده په غاړه لري.
د تالقان مرکزي روغتون طبي وسایل، اړین درمل، ډیټابیس سیستم او اداري تجهیزارت نه لري او ټاکلشوې وه چې دا یو نیم میلیون ډالره د تجهیزاتو او روغتون د اړتیا وړ توکیو لهپاره لګولشوې وای .
د سلام وطندار خبري شبکې له راپور سره سم؛ دا ۱،۶۴۹،۹۱۸.۵۳ امریکايي ډالره د عامې روغتیا وزارت او عزیزي بانک ترمنځ د «ضمانت» په توګه اېښودل شوي و چې بیا تیرکال د المان مالي او تخنیکي مرستو دفتر (KFW) د عامې روغتیا وزیر ته په یوه لیک کې ویلي و چې د افغانستان بانک له لارې دې له عزیزي بانک څخه دا مبلغ وصول کړي چې افغانستان بانک ورته منفي ځواب ورکړی و.
د تخار مرکزي چارواکي وایي چې د روغتون د طبي تجهیزاتو پیسې د عزیزي بانک پهواسطه او د حکومتي چارواکیو په همغږۍ غلا شويدي.
بلخوا عزیزي بانک ویلي چې دوی ته د جرمنانو د اضافه کاري ۱۲۵ زره دالره ورکړل شوي او هغوی ته یې رسولي او د یو نیم میلون دالرو د پیسو د ورکړې ادعاوې بې اساسه او له حقیقت څخه لرې خبره ده.
د سلام وطندار شبکې ویلي چې پوره یوه میاشت یې هڅه کړې ترڅو پدې اړه د عامې روغتیا وزارت نظر هم واخلي خو هغوی ترې په بیلابیلو پلمو ځان خلاص کړی دی.
دا لمړی ځل ندی چې په حکومت کې د دومره لوړې کچې فساد ترسره کیږي، څه موده وړاندې د مخابراتو پر وزارت هم تور ولګیده چې له مخابراتي شبکو څه د لس سلنې محصول کې لسګونه میلونه دالره درغلي شوې او شخصي جیبونو ته تللې دي.
څو میاشتې وړاندې ځینو رسنیو راپورونه ورکړي و چې د عامې روغتیا په وزارت کې په لوړه کچه فساد روان دی او له عادي ډاکټر نیولې بیا تر لوړپوړو چارواکو پورې په فساد کې ښکیل دي.
