اجراييه رییس او ولسمشر پر ملکي مرګ ژوبلې ولې چوپ پاتې کېږي؟
(کابل ټکی کام ۱۳۹۶لړم ۱۶): په افغانستان کې د ګډ حکومت له راتګ وروسته په ځلونو د بهرنيو ځواکونو له لوري په هوايي بمباريو او شپنيو چاپو کې ملکي خلکو ته مرګ ژوبله رسېدلې، خو د درې کلونو په موده کې يو ځل هم د ګډ حکومت د مشرانو له لوري د بهرنيانو دغه عمل نه دی غندل شوی او نه يې په اړه غبرګون ښودل شوی.
که څه هم د کرزي د واکمنۍ پر مهال هم بهرنيانو په خپلو بريدونو کې ولسي خلک په نښه کول، خو نوموړي به د هغوی دغه ډول بريدونه په کلکو ټکو غندل.
د بهرنيو ځواکونو له لوري پر ملکي خلکو دوامداره بمباريو اوشپنيو چاپو کې د هغوی مرګ ژوبلې خلک په غوسه کړي او يو شمير شنونکي د ګډ حکومت دغه عمل له شرمه ډک بولي.
د شنونکو په باور په تېرو درې کلونو کې هيڅ داسې مورد نه دی پېښ شوی چې د ولسمشر يا اجرايیه رييس له لوري دې پر ملکي خلکو د بهرنيو ځواکونو بمبارۍ وغندل شي او يا دې يې په اړه غبرګون وښودل شي.
د سياسي چارو شنونکی وحيد مژده وايي، ولسمشر غني او اجراييه رییس عبدالله د بهرنيانو د خوشحالولو لپاره د ملکي افغانانو پر مرګ ژوبله چوپ پاتې کېږي او يواځې د خپلې چوکۍ غم ورسره دی.
نوموړی زياتوي، د حکومت چوپ پاتې کېدل د دې لامل شوي، چې بهرنیان لا زیات سپین سترګي شي او ملکي مرګ ژوبله بېخي ورته بې مانا شي.
هغه وايي، که د بهرنيانو له لوري د ملکي خلکو مرګ ژوبله همداسې دوام پيدا کړي، نو خلک به د غچ اخيستلو لپاره مجبوره شي، ترڅو د طالبانو ليکو ته ورشي او د هغوی سره وسله واخلي او په خبره يې چې، د بهرنيانو له لوري ملکي خلکو ته مرګ ژوبله اړول د جګړې د دوام په معنا دي.
مژده رسنيو ته ويلي، چې د کندز په چهاردرې ولسوالۍ کې يې له خلکو سره خبرې کړي او د څو طالبانو لپاره پر ټول کلي داسې بمونه غورځول شوي، چې درېواړه کلي يې په مکمله توګه ويجاړ کړي دي.
شاوخوا يوه اوونۍ مخکې د کندوز په چاردرې ولسوالۍ کې بهرنیو ځواکونو درې کلي بمبار کړل، چې ګڼو ملکي وګړو ته پکې مرګ ژوبله واوښته.
د ناټو د پرېکنده ملاتړ ماموريت په دې اړه د پلټنو د پيل خبر ورکړ، خو وروسته يې وويل چې هلته د ملکيانو وژل کېدل نه مني.
د فسبوک کاروونکي وايي، د کندز د چهاردرې او د امریکا د تکساس پېښه تقريباً په يوه اوونۍ کې رامنځته شوې، خو د ګډ حکومت مشرانو د تکساس پېښه وغندله او پر هغې يې خواشينې ښکاره کړه او د کندز په پېښه لا هم چوپ پاتې دي چې دا د شرم خبره ده.
سياسي کارپوه حسين سجادي مسير ورځپاڼې ته ويلي، تاسو د اجرایه رییس ټوېټر وګورئ، هغه په امریکا کې په یوه کلیسا برید غندلی؛ خو په خپل کندوز کې د نږدې شپيتو کسانو پر وژل کېدو او د دریو کلیو پر ویجاړېدو چوپ دی.
د هغه په وینا ولسمشر هم د دې لپاره چې بهرنیان یې د راتلونکې دورې لپاره بیا ولسمشر کړي د خپل ولس پر سرونو سودا کوي.
د ملي دفاع وزارت وياند دولت وزيري وايي، بهرني ځواکونه ټول بريدونه د افغان ځواکونو په مشوره کوي ځمکني اهداف ورته افغان ځواکونه په نښه کوي.
نوموړی وايي، د کندز په چهاردره کې يې د يادو کليو اوسېدونکو ته د وتلو لپاره خبرداری ورکړی و، ښايي ډیری خلک وتلي وي، خو لا هم په دغه کليو کې پر ملکي مرګ ژوبلې ناخبري ښيي.
