که د حکومت نیمايي امکانات له طالبانو سره وای!

لیکوال : خالد روان
د امریکايي یرغل وروسته سلګونه غږیزې، انځوریزې، چاپي او نړۍ جال خپرونو په فعالیت پیل وکړ. د موسساتو له کارکوونکو وروسته ښې پیسې په رسنیو کې پیدا کېدې او رسنیو «د غولیدلو وروڼو» په اعلاناتو بلا پیسې پیدا کړې. زیاتې رسنۍ اوس هم د بهرنیو سفارتونو دي او هر سفارت خپلې یوې، دوه او درېو رسنیو ته په بوجو کې پیسې لېږي. ځینې رسنۍ لکه د پسرلي گلان وغوړېدې؛ خو د گرمۍ له امله بېرته مړاوې شوې او پیسې پرې بندې شوې.
امریکا او حکومت د طالبانو د بدنامۍ لپاره له هرې وسیلې کار واخیست. طلوع ټلویزون د کندوز پوهنتون سلګونه ښځینه محصلینو ته سپکاوی وکړ، خامه پرېس چټیات ولیکل، د کندهار د ښورابک د اوبو بند یې هوايي ویجاړ کړ او د خلکو د ذهنونو د خرابولو لپاره یې هره نادوده وکړه.
د څو روپیو په بدل کې یې «افغان ستوري» خپرونې له‌پاره سلګونه تور سرې د خلکو په منځ کې ونڅولې، سریالونه، جنگونه، ډمان او نڅاگر یې په ټولنه کې ښه ډېر کړل او دغه لړۍ تراوسه په ډېرې بې شرمۍ روانه ده او حکومت یې د مخنیوي له‌پاره هېڅ نه کوي.
د درې سوه ډالرو په بدل کې یې ۱۲۰ فېسبوکیان فعال کړل، چې ټوله ورځ د طالبانو پرضد پوسټونه وکړي او حکومت ته پرتوگونه وگنډي. د هرې ادارې لپاره یې یو ویاند، یو مرستیال او یو د مرستیال ـ مرستیال وټاکه؛ خو سره له دومره امکاناتو، رسنیو، ویاندویانو او بهرني او سیمه‌ییز ملاتړ سربېره دوی دوه طالبانو ویاندویانو د ټینگې نه‌دي.
حکومت خبر نه وي، چې طالب ویاندویان د پېښې بشپړ جزییات له رسنیو سره شریک کړي. حتی انځورونه، ویډیوگانې او د پېښې اصلي ځای ته یې ځان رسولی وي او په خپلو پاڼو کې یې خپاره کړي وي.
د دفاع وزارت ویاند دولت وزیري خو د انځور اخیستلو په ډرون کمره کې هم د سلو طالبانو د مرگ ژوبلې خبر ورکړي، په یوه موټر سایکل د دوو سوو طالبانو د مرگ ژوبلې خبر په ښه صفا غاړه خپور کړي؛ خو د ملکي وگړو د شهادت په ورځ بیا دولت وزیري نه په کرښه کېږي او نه ټېلفون ته ځواب وايي.
زه په پوره باور سره وایم. که طالبان د حکومت په سلو کې ۲۵سلنه امکانات هم په لاس کې ولري؛ نو په ټوله نړۍ کې به د معلوماتو په چټک خپرولو او له رسنوالو سره د معلوماتو په شریکولو کې نړۍ‌وال ریکارډ ټینگ کړي.
طالبان چې هر څه کوي د خپلې عقیدې لپاره یې کوي؛ خو حکومتي ویاندویانو باندې چې یوه ورځ معاش وځنډېږي؛ نو له خولې به اوف هم ونه باسي.
حکومت، ویاندویان او خیاطان دې پر دې پوه شي، چې تاسې د هغه چا مخالفت نه شئ کولی، چې ځان ته حق وايي او حق تل بریالی وي.