کندهار: طالبانو په میوند کې لسګونه افغان عسکر وژلي دي
(کابل ټکی کام ۱۳۹۶ لړم ۲۳ فریدافغان)
د کندهار ځایي چارواکي وایي چې تیره شپه طالبانو د میوند ولسوالۍ د امنیتي کمربند پر پنځلسو پوستو ډلیزپه بریدونه کړي دي چې له امله یې لسګونو افغان ځواکونو ته مرګ ژوبله اوښتې ده.
د چارواکو په خبره؛ وسله والو د هلمند له لښکرګاه دوراهي څخه بیا د ژېړۍ ولسوالۍ تر کمر بند پوري د مندوزو، برن مانده، خاک چوپان او بند تېمور پوستې تر بریدونو لاندي راوستلي.
د کندهار د پولیسو ویاند مطیع الله هلال وایې، په دغه څو ساعتیزه جګړه کې ۲۲ افغان عسکر وژل شوي او ۱۵ نور ټپیان دي.
وسلوالو طالبانو د دې حملو مسؤلیت منلی او په یوه خبرپاڼه کې یې له ۴۰ ډیرو عسکرو د وژلو او د هغوی د یو شمیر وسایطو د له منځه وړلو خبر ورکړی دی.
د وسلوالو طالبانو ویاند قاري یوسف احمدي رسنیو ته په استولې خبرپاڼه کې ویلي چې په میوند کې یې درۍ پوستې نیولې او د ۴ قوماندانانو په ګډون یې ۴۶ پولیس او اربکیان وژلي او د هغوی ۴۲ میله سپکه او درنه وسله او د شپې دوربینان یې په لاس ورغلي دي .
طالبانو همداراز ویلي چې په تیره یوه شپه کې یې په فراه، هلمند او کندهار کې یې په بیلابیلو حملو کې ۷۳ تنه پولیس او اربکیان وژلي دي.
د یادونې وړ ده چې څو ورځې وړاندې د ملي دفاع سرپرست وزیر طارق شاه بهرامي ویلي و چې د طالبانو پیچلي تکتیکي بریدونه ۱۳ سلنه ډیر شوي چې وروستي هغه یې خورا دقیق او خطرناک و.
