پاکستان د پوليو کارت نه لرونکو افغانانو ته ويزې نه ورکوي
(کابل ټکی کام، ۱۳۹۶، مرغومی ۱۰) په کابل کې د پاکستان سفارت په يوه خبرپاڼه کې ويلي، هغو افغانانو ته به ويزې ورنه کړي چې د پوليو يا ګوزڼ ضد سند يا کارت ونه لري.
د پاکستاني سفارت له لوري په خپره شوې خبرپاڼه کې راغلي، چې د دسمبر له اووه ويشتمې نيټې راوروسته به د ويزې لپاره د هغه چا غوښتنليک ونه منل شي، چې د ګوزڼ واکسين سند يا کارت ونه لري.
د روغتيايي مسئولينو د معلوماتو پر بنسټ، ګوزڼ يا فلج د چاپېريال د ککړتيا، ککړو اوبو او خوړو په واسطه له انسان څخه انسان ته د تنفسي سيسټم له لاري او له يوې خولې څخه بلې خولې ته داخلېږي.
تر دې مخکې په افغانستان او پاکستان کې په پراخه کچه د ګوزڼ ضد واکسين کمپاينونه شوي او په دغه وايرس د اخته ناروغانو کچه راټيټه شوې ده، خو د پاکستان سفارت وايي ځکه يې پر ويزه اخيستونکو کسانو د واکسين کارت لازمي کړی، څو وکړی شي چې دغه ناروغي له هېواده په بشپړه توګه له منځه يوسي.
