سوریه: امریکایان په رڼا ورځ داعشیان په چورلکو کې نامعلوم لوري ته وړي

(کابل ټکی کام ۱۳۹۶ مرغومی ۱۰ فرید افغان)

د سوریې دولتي خبري اژانس ‹‹سانا» خبر ورکړی چې امریکایي چورلکې د دې هیواد د الحسکه له سیمې څخه داعشيان نامعلوم لوري ته وړي
اژانس ویلي؛ چورلکې د سوریې د شمال ختیځ ښار اړوند د ‹‹السدالباسل›› په نامه کیمپ داعشیان انتقالوي.
تر دې وړاندې خبرونه ورکړل شوي و، چې د داعش ډلې یوشمیر غړي د سوریې د دیرالزور ښار اړوند د ‹‹الشعیطات›› له سیمې څخه دې قرارګاه ته راوړل کیږي.
خو اوس د داعش یاد ډلمشران له دې سیمې هم ایستل کیږي او داځل نامعلوم لوري ته وړل کیږي .
آژانس زیاتوي؛ دادوهم ځل دی چې امریکایان دې عملاً د دې ډلې مشران په نظامي چورلکو کې لیږدوي
تیره میاشت هم د دې ډلې ۴۷ مشران امریکایي چورلکو کې د سد سیمې ته راوړي و.
امریکا داسې مهال د دې ډلې په انتقال تورنیږي چې څو ورځې وړاندې روسیې هم اندیښنه ښودلې وه چې د امریکا په ګډون ځینې لوی استخباراتي سازمانونه غواړي په سوریه او عراق کې ځپل شوي داعشیان افغانستان ته ولیږدوي او هلته د خپلو اهدافو د ترلاسه کولو په موخه ترې کار واخلي.
د راپورونو تر مخه؛ په سوریه او عراق کې داعش ډلې ۹۰ سلنه واک، ځواک او سیمیز نفوذ له لاسه ورکړی او د دې ډلې ډیری افراد یا القاعدې ډلې ته ور اوښتي، یا هم له منځه تللی او یا یې هم په کور ناسته غوره کړې ده