(کابل ټکی کام، ۱۳۹۶، مرغومی ۲۶) شاوخوا درې ورځې وړاندې داسې راپورونه ورکول شول، چې په ترکيه کې د حزب اسلامي په منځګړيتوب د افغان دولت او طالبانو تر منځ د افغان سورلې په تړاو خبرې روانې دي.
د حزب اسلامي يوه پلاوي همايون جرير وويل، په دغې ناسته کې د طالبانو پلاوي او د هغوی د سياسي دفتر استازی هم شتون لري.
خو د طالبانو وياند ذبيح الله مجاهد او د سياسي دفتر له ادرسه رسنيو ته په لېږلې خبرپاڼه کې د دوی د استازو ګډون رد کړی او ويلي يې دي: (د اسلامي امارت هیڅ استازی په دې غونډه کې ګډون نلري.)
ښاغلي مجاهد دا ناسته يوه (جعلي پروسه) او پکې ګډون کوونکي يې (جعلي څهرې) بللي دي، زياتوي چې دغه ډول جعلي پروسې به افغان سوله لا پسې زيانمنه کړي.
ځينو رسنيو ويلي، په دغه ناسته کې د (رحمت الله وردګ) په نوم چې ځان د طالبانو د سياسي دفتر غړی معرفي کوي هم ګډون کړی، خو د طالبانو د سياسي دفتر له ادرسه ويل شوي چې (رحمت الله وردګ له سیاسي دفتر سره هیڅ ډول مستقیم یا غیر مستقیم تړاو نه لري او نه دا د اسلامي امارت غړی دی.)
دا لومړی ځل نه دی، بلکې تر دې مخکې هم په ځينو نورو هېوادونو کې د سولې پروسې اړوند ناستې شوي، خو طالبانو په هغو ناستو کې چې ګډون کړی تاييد کړي او هغه چې د ځينو کړيو له خوا ترسره شوي رد کړي دي.
هغه وضاحت ليک چې کابل ټکی کام ته د طالبانو د وياند ذبيح الله مجاهد له لوري رسېدلی تاسې ته يې هم کټ مټ نشروو:
په ترکیه کې د سولې د پروسې د جعلي استازو په هکله د اسلامي امارت د سیاسي دفتر اعلامیه
درۍ ورځې مخکې ځینو رسنیو راپور ورکړ چې په ترکیه کې د حزب اسلامي په مینځګړیتوب د طالبانو او د کابل د ادارې استازي راټول شوي او په افغانستان کې د سولې په اړه خبرې کوي.
دوی دا هم ویلي چې د نوموړو کسانو دغه درېمه غونډه ده خو دوه نورې غونډې یې پټې ساتلې شوې دي.
د دغې غونډې یو ګډونوال چې ځان یې ملا عبدالروف معرفي کاؤ، په رسنیو کې راڅرګند شو او ویې ویل چې درې واړه غونډې یې په تعارفي او ابتدايي خبرو تیرې کړې دي.
د اسلامي امارت ویاند ذبیح الله مجاهد دغه راپور په کلکه رد کړی او ویلي یې دي چې د اسلامي امارت هیڅ استازی پدې غونډه کې ګډون نلري. ده واضح کړې، دا یوه جعلي پروسه او جعلي څهرې دي او افغانستان کې سوله د جعلي پروسو په کار اچولو او جعلي څهرو په رامخ ته کولو نه راځي بلکې ورته تاوان رسوي.
څنګه چې په رسنیو کې ادعا شوی چې پدې غونډه کې د رحمت الله وردګ په نامه یو ګډونوال د اسلامي امارت سیاسي دفتر سره تړاو لري نو سیاسي دفتر غواړي ټولو هیوادوالو او نړیوالو ته اعلان کړي چې رحمت الله وردګ له سیاسي دفتر سره هیڅ ډول مستقیم یا غیر مستقیم تړاو نه لري او نه دا د اسلامي امارت غړی دی.
دا یوه استخباراتي او پروژه ایزه لوبه ده، غواړي د افغانستان د سولې واقعي پروسه زیانمنه او بدنامه کړي او د اشغال د غزیدو اسباب برابر کړي.
باید ووایو، اسلامي امارت د سولې د واقعي پروسې طرفدار دی او د همدې لپاره یې سیاسي دفتر ته وظیفه سپارلې چې د افغانستان د مسئلې سوله ایز حل ولټوي.
اسلامي امارت واضح اجنډا لري چې هغه د اشغال خاتمه او په هیواد کې د افغان شموله اسلامي نظام راوستل دي.
د همدې مقصد لپاره اسلامي امارت د سیاسي دفتر له لارې تل په ټولو خواوو چې د مسئلې د حل واک لري غږ کړی چې د خبرو میز ته راشي.
خو لا تر اوسه د مسئلې بل پلو د سولې ستراتیژي نلري، یوازې د سولې شعارونه ورکوي او د سولې جعلي پروسې په کار اچوي چې هغه نه د مسئلې حل دی او نه زموږ د ولس درد دوا کولی شي.
موږ یو ځل بیا په ټولو غږ کوو چې د افغانستان د مسئلې واقعي حل ته مخه وکړي او نور دې په یوه او بله پلمه د سولې سپیڅلې کلمه نه زیانمنوي.
د اسلامي امارت سیاسي دفتر
۱۴۳۹/۴/۲۹هـ ق
۱۳۹۶/۱۰/۲۶هـ ش ــ 2018/1/16م
۱۴۳۹/۴/۲۹هـ ق
۱۳۹۶/۱۰/۲۶هـ ش ــ 2018/1/16م
