(کابل ټکی کام ۱۳۹۶ مرغومی۳۰ فرید افغان)
د عطانور او اشرف غني تر منځ د بلخ دواکمني پر سر ناندریو او چنو نوی رنګ اخیستی دی.
نن د ارګ ویاند هارون چخانسوري په یوه خبري ناسته کې د طلوع نیوز او ځینو نورو رسنیو هغه راپورونه رد کړل چې ګواکې د جمعیت ګوند ته د ځینو امتیازاتو ورکول منل شوي دي.
نوموړي وروسته تر هغه چې امریکایي سفیر په یاده موضوع مداخله وکړه وویل؛ د بلخ موضوع یوه کوچنۍ موضوع ده او ژر به حل شي
د نوموړي تر دې څرګندونو وروسته عطانور یوې خبري ناستې ته څرګنده کړه چې؛ حکومت، اجرایه ریاست، پارلمان او قضایه قوه ټول غیرقانوني دي اوو په وینا یې چې که غوښتنې یې ونه منل شي نو حکومت ته به لوی سرخوږی جوړ کړي.
نوموړي زیاته کړه؛ چمتو دی چې د بلخ له ولایت څخه استعفا وکړي خو په دې شرط چې ولسمشر اشرف غني او د ملي یووالي حکومت اجرائیه رئیس عبدالله عبدالله هم له خپلو دندو لاس په سر شي ځکه چې په وینا یې دوی درۍ واړه د واک شریکان دي.
عطانور وویل چې که ارګ ورسره توافق ته ونه رسیده د قذافي په برخلیک به اخته شي
نوموړي همداراز د امریکا له سفیر جان باس وغوښتل چې لومړی دې د افغانستان اساسي قانون سم مطالعه کړي بیا دې څرګندونې کوي.
بل پلو دې جنجالونو بیا ولسمشر غني په خپلو وزیرانو بدګمانه کړی او له هغو وزیرانو سره یې چې د نوموړي د حلیف عطانور ملاتړي دي سختې تربګنۍ راپورته کړې دي.
د رشد خبري اژانس د راپور ترمخه، په پام کې وه چې د بهرنیو چارو وزیر صلاح الدین رباني د ملګرو ملتونو په عمومي غونډه کې نیویارک ته لاړ شي، خو ولسمشر ورته ویلي چې د نیویارک پرځای دې لومړی د بلخ د جنجال په اړه ورسره خبره یو طرفه کړي.
اژانس ویلي؛ غني رباني ته ویلي چې امریکایانو ورباند ې فشار راوړی چې ژر ترژره باید ګډه ناسته ترسره کړي.
د غني له تلیفوني اړیکې وروسته نوموړی مجبوریږي ترڅو د دې وزارت له سیاسي معین حکمت خلیل کرزي چې دا مهال دوبۍ په سفر تللی و، وغواړي ترڅو نیوریاک ته ولاړشي.
اژانس وایي؛ کله چې رباني له هوایي ډګر څخه بیرته ارګ ته ځي معلومیږي چې هیڅ هم نشته او یواځې د مذاکراتو په پلمه نیویارک ته د وزیر د تګ مخه نیول شوې ده.
اژانس ته یې سرچینو ویلي چې رباني اوسمهال بلخ ته تللی او له هغه ځایه به ترکیې ته ولاړ شي او ښایي روان جنجال نور هم پسې وغځیږي.
