(کابل ټکی کام ۱۳۹۶ مرغومی ۳۰فرید افغان)
د ټیلګراف ورځپاڼې د راپور تر مخه د بریتانیا یوې محکمې پر یوه ۱۸ کلن ځوان تور لګولی چې له دریو کلونو راپه دیخوا یې د امریکا د مرکزي استخباراتو سي آی اې پرمختللي کمپیوتري سیستمونه هیک کړي او په افغانستان او ایران کې یې د دې شبکې محرمو عملیاتو ته لاس رسی موندلی دی.
نوموړي له تیرو څو کلونو راهیسې دامعلومات د ویکیلیکس ویبپاڼې له لارې خپرول او امریکا ګومان کاوو چې ښایي دا انترنتي بریدونه د هیکرانو یوې لویې تنظیم شوې ډلې له خوا پرمخ بیول کیږي.
محکمې ویلي چې نوموړي خپل ځان د سي آی اې د پخواني رئیس جان برانن په نوم معرفي کړی وو او په همدې توګه یې مهم معلومات لاس ته راوړي دي.
بریتانوۍ محکمې ویلي چې نوموړي ځوان په ۱۵ کلنۍ وکولی شو چې د امریکا د مرکزي استخباراتو ادارې پرمختللي سیستمونه هیک کړي او په افغانستان او ایران کې د امریکا د پټو عملیاتو په اړه معلوماتو ته لاس رسی پیدا کړي .
دې ځوان د اجتماعي انجینري د پروګرام په توسط له مختلفو ادرسونو معلومات غوښتي دي او د سي آی اې د رئیس جان برینن له نوم څخه په استفادې سره یې د ډیری امریکایي مشرانو کمپیوتري سیستمونو او محرمو معلوماتو ته لاره موندلې وه .
د امریکا د استخباراتي ادارو مامورینو ته یې پیغامونه استول او تیلفونونه یې ورته کول او کله به یې د هغوی مشر په نامه تحدیدول.
نوموړي د اف بي ای د معلوماتو د پیداکولو په موخه ددې ادارې د مشرانو په نوم ځان معرفي کړی و او همداراز یې د پخواني امریکایي ولسمشر په وخت کې د امریکا دکورني امنیت وزارت او د اوباما استخباراتي سلاکار هم ننګولي دي.
محکمې ویلي کین ګمبل د امریکایي چارواکو ژوند په خپل لاس کې اخیستی و، د هغوی کمپیوترونو ته یې بربنډ فلمونه استول او تلویزیونونه، او معلوماتي ویبسایتونه یې ټول تر کنترول لاندې وو.
نوموړي د ۲۰۱۶ په فبروري میاشت کې د امریکا د عدلیې وزارت معلوماتو ته لاسرسی پیدا کړ او د سي آی اې د ۲۰ زره مامورانو په هکله یې هم معلومات لاس ته راوړل.
نوموړی اوس مهال په محکمه کې دی او ټول لګول شوي تورونه یې منلي دي.
تر اوسه محکمې د نوموړي په هکله پریکړه نه ده کړې.
نوموړي محکمې ته ویلي؛ هرڅومره به چې مخته تلم راته معلومیده به چې د امریکا دولت څومره فاسد دی نو به مې د هغوی د آزارولو جذبه لا راپاریدله
