برتانيا هم سوريه کې هوايي بريدونه پيل کړل
کابل ټکی کام ۱۲لېندۍ/۱۳۹۴، قدرت الله حسین
له امريکا روسيې او فرانسې وروسته برتانيا هم سوريه کې د داعش ډلې پر ضد هوايي جګړه پيل کړه.
د برتانیا دفاع وزرات ويلي، الوتکو يې نن سهار سوريه کې د داعش پر مرکزونو بريدونه وکړل.
ياد هيواد وروسته له هغه دغه بمباري پيل کړه، چې پارلمان يې له ډېر بحث وروسته د بريدونو اجازه ورکړه.
د پارلمان ۳۹۷ غړو د برتانيا د لومړي وزير ډيويډ کامرون دغه وړانديز تاييد کړی او ۲۲۳ نورو يې مخالفت کړی، چې وروسته پر دې اتفاق وشو چې دا حملې دې پيل شي.
امريکا د برتانيا د دغې پرېکړې هرکلی کړی، ولسمشر اباما په دې اړه ويلي، چې د داعش ضد جګړه کې يې برتانيا يو مهم همکار دی.
د برتانيا د پارلمان مخې ته سلګونو خلکو د يادې پرېکړې پر ضد مظاهرې کړې دي او زياته کړې يې ده، چې شونې ده په دې بريدونو کې ولسي خلک ووژل شي.
