هلمند: طالبانو پوسته نيولې- اووه پوليس وژل شوي
(کابل ټکی کام، ۱۳۹۶، سلواغه ۲) د هلمند ولايت په ګرمسير ولسوالۍ کې وسله والو طالبانو د امنيتي ځواکونو په پوسته بريد کړی، چې له کبله يې اووه پوليس وژل شوي دي.
يوې امنيتي سرچينې پژواک ته د ويلي، طالبانو تېره شپه د سلواغې په سيمه په امنيتي پوسته بريد وکړ، په ترڅ کې يې اووه پوليس ووژل شول او يو بل ټپي شو.
په عين حال کې د هلمند د والي وياند عمر ځواک هم په ياده سيمه کې پوليسو ته د مرګ ژوبلې اوښتل تاييدوي خو په اړه يې کره معلومات نه دي په ډاګه کړي.
له بله پلوه طالبانو د بريد مسئوليت په غاړه اخيستی او کابل ټکی کام ته يې په رالېږلې خبرپاڼه کې ويلي، چې د يادې ولسوالۍ مربوط د چوغکو کلا په سيمه کې يې له سنګوري اربکيانو يوه پوسته نيولې او پکې ميشت اته تنه اربکيان وژل شوي او پنځه تنه نور ټپيان دي.
طالبان وايي، د بريد په پايله کې پوسته او يو موټرسايکل په مکمله توګه ويجاړ شوي او دغه راز د وژل شويو پوليسو اته ميله سپکې- درنې وسلې او په پوځي توکي يې هم نيولي دي.
د ګرمسير ولسوالۍ له مرکز پرته نوره ټوله ولسوالۍ باندې طالبان واکمن دي.
