د امریکا د دفاع وزارت جګپوړي چارواکي، د سې شنبې په ورځ، د امریکا د سنا مجلس د بهرنیو اړیکو کمېټې ته ویلي چې سږ ۲۰۱۸ز کال کې به د افغانستان جګړه ۴۵ میلیارده ډالر لګښت ولري.
د اسیا او پاسیفیک په امنیتي چارو کې د امریکا د دفاع وزارت مرستیال، رنډال شریور، وايي، په ۴۵ میلیارده ډالرو کې ۱۳ میلیارده ډالر په افغانستان کې د مېشتو امریکايي ځواکونو لپاره، ۵ میلیارده د افغان ځواکونو لپاره، ۷۸۰ میلیونه د اقتصادي مرستې لپاره او پاتې نور د لوژستیکي اکمالاتو لپاره ځانګړي شوي دي.
په افغانستان کې د امریکا د جګړې سږني لګښتونه د ۲۰۱۰ز او ۲۰۱۲ کال تر لګښتونو زیات کم دي. په هغو کلونو کې، نږدې ۱۰۰ زره امریکايي سرتېري په افغانستان کې مېشت وو چې کلنی لګښت یې تر ۱۰۰ میلیارده ډالرو زیات و.
د امریکا د سنا د بهرنیو اړیکو د کمېټې په همدې غونډه کې، سناتورانو د افغانستان د جګړې پر لوړو لګښتونو نیوکه وکړه.
د کنټاکي ایالت جمهوري غوښتونکي سناتور، رانډ پاول، په افغانستان کې د امریکا پر لوړو لګښتونو باندې په نیوکې سره وویل چې میلیاردونه ډالر په افغانستان کې ولګول شول، خو افغانان اوس هم پخپله د ځان دفاع نشي کولای. د نوموړي اشاره افغان ځواکونو ته وه چې له میلیاردونو ډالرو مرستو سره سره بیا هم، له طالبانو سره د جګړې جوګه نه دي.
امریکا د افغان ځواکونو پر وسلو او تجهیزاتو ۷۶ میلیارده ډالر لګولي
اشرف غني: که د امریکا ملاتړ نه وي، افغان پوځ ۶ میاشتې هم مقاومت نه شي کولای
په دې غونډه کې ډموکراټ سناتور، ایډ مارکي، وویل، ”د دې پر ځای چې دا پیسې په افغانستان کې پر جګړه ولګول شي، باید په امریکا کې دننه د هغو کسانو درملنه پرې وشي چې نشه یي توکي کاروي.“
یوه بل سناتور، جیف میرکلي، هم په افغانستان کې د فساد زیاتوالي، د حکومت او امنیتي ځواکونو ناکاري ته اشاره وکړه. نوموړي د ډونلډ ټرمپ او د امریکا نوې سټراټیژۍ ته په اشاره کولو سره ویلي چې د زور په کارولو طالبان د خبرو مېز ته راوستل امکان نه لري. میرکلي همداراز پوښتنه وکړه، ”طالبان ولې باید په داسې حال کې یو سیاسي توافق ومني چې له ۲۰۰۱ز کال راهیسې تر هر وخت زیاتې سیمې په کنټرول کې لري؟“
طالبان د افغان ځواکونو په وسلو جګړه کوي
د امریکا په تاریخ کې په تر ټولو اوږده جګړه کې، چې ۱۶ کاله وروسته یې هم پای نه معلومېږي، تر یو ټریلیون زیات امریکايي ډالر مصرف شوي دي.
