(کابل ټکی کام ۱۳۹۶ سلواغه ۲۵ فرید افغان)
د امریکا مرکزي استخباراتو ادارې یا (سي آی اې) د تیرې ورځې په څیړنیز راپور کې راغلي چې راروان اوړی به د جګړو ښکیلو غاړو او په ځانګړې توګه ولسي خلکو ته ترټولو خونړی وي.
د وال استریت ژورنال ورځپاڼې د خبر ترمخه؛ چې دا راپور ورته رسیدلی، راغلي؛ امریکا به په راتلونکي کال کې د ولسي خلکو پر میشت ځایونو، او د تجمعاتو په لویو غونډو او محافلو حملې زیاتې کړي ترڅو خپل مخالفین د ملکیانو په منځ کې په نښه کړي،چې ښایي دا کړنلاره به غوڅ اکثریت ولسي خلک تلف کړي.
د امریکا د مرکزي استخباراتي شبکې راپور وایی “ د افغانستان وضعیت په ټولیزه توګه له نسبي امن څخه د بدلون په حال کې ده.
په حکومت کې تل پاتې سیاسي بې ثباتي،د شکیلو خواوو راتلونکي قوي بریدونه، د امنیتي ځواکونو کمزوری مدیریت او نورې چارې به دا لړۍ ترټولو سخت پړاو ته داخله کړي.“
د سي ای اې راپور وایي چې ښایي افغان دولت د روان کال د جولای په میاشت کې پارلماني او راتلونکی کال د جمهوري ریاست ټاکنو ترسره کولو ته زړه ښه کړي.
په همدې مهال طالبانو امریکایي ولس ته په یو اوږد لیک کې له هغوی غوښتي چې خپل حکومت دې وهڅوي چې نور په افغانستان کې خپل اشغال پای ته ورسوي او د دې هیواد وګړي دې پریږدي چې په یو خپلواک تغر سره راتول شي.
په لیک کې راغلي؛ امریکا که د طالبانو د ماتیدلو او خپلو منافعو د لاس ته راوړلو په هیله که هرڅومره قوت وکاروي بریالي به نه شي.
طالبانو امریکایي ملت ننګولی چې د دوی په مالیو یو فاسد، بیواکه او غیرقانوني حکومت واک ته رسیدلی، او که له خپل جګړه خوښ حکومت سره نور هم د افغانستان په اشغال کې مرسته کوي نو دلسګونو زرو عسکرو تر وژل کیدو وروسته دې همدومره نور تابوتونه هم افغانستان ته ولیږي.
