وردګ والي: د تېرې ورځې پر وژنه تورن سرتېری به محاکمه شي

کابل ټکی کام ۱۴لېندۍ/۱۳۹۴، احمدالله مهاجر
تېره ورځ د میدان وردګ ولایت د سیدآباد ولسوالۍ د اوتړیو نومې کلي په یوه جومات کې د ملي اردو عسکرو له خوا یوه هاوان مرمۍ ګوزار کړی شوه چې له امله یې ۱۲تنه عام وګړي ووژل شول او ۷تنه نور ژوبل شول.
د میدان وردګ ولایت والي ښاغلی حیات الله نن شنبه ځينو رسنیو ته ویلي دي چې د دې پېښې د څېړلو لپاره یې یو پلاوی سیمې ته استولی دی.
حیات وویل چې یاد پلاوی به د ملي اردو له لورې د ملکي وګړو پر جومات د برید ولې روښانه کړي.
حیات همدا راز وویل چې د یادې پېښې د ملکي وګړو د وژنې په تور یې یو شمېر ملي اردو سرتیري نیولي دي.
د ده پر وینا که دوی مجرمین ثابت شي، نو محاکمه به کړی شي.
له بلې خوا د وردګو د ولایت ولایتي شوراء غړی ښاغلی شریف الله هوتک وویل چې یاده پېښه د ملي اردو له لورې په قصدي ډول را منځته شوې ده.
هوتک افغان دولت ته د خبرداري په توګه وویل: «مجرمین دې محاکمه کړی شي، کني پر لاریون لاس پورې کوو.»
له یادې پېښې وروسته د سیمې سلګونه خلکو د ۶ساعتونو لپاره د کابل-کندهار لویه لاره په سیداباد ولسوالۍ کې د ترافیکو پر مخ تړلې وه، او له دولت څخه یې د ملکي وګړو پر وژنه د تورنو سرتېرو د محاکمه کېدو غوښتنه کوله.