فراه: طالبانو په بالابلوک کې لویه پوځي قرارګاه نیولې

(کابل ټکی کام ۱۳۹۶ کب ۵ فرید افغان)

راپورونه وایي چې طالبانو تیره شپه د فراه ولایت د بالابلوک ولسوالۍ اړوند د کنسک سیمه کې لویه پوځي قرارګاه نیولې.
که څه هم دولتي چارواکو تر اوسه په دې تړاو کوم سپیناوی نه دی کړی خو د سیمیزو سرچینو له قوله؛ قرارګاه په بشپړ ډول سقوط کړی او ګڼ شمیر عسکرو ته په کې مرګ ژوبله اوښتې.
د دولایت د ولایتي شورا مرستیال شاه محمود نعیمي وایي چې برید لومړی د طالبانو یو نفوذي پولیس تر سره کړ او ۲۲ تنه پولیس یې ووژل چې بیا وروسته نورو کومکي طالبانو قرارګاه په بشپړه توګه ولجه کړه.

دهیواد په لویدیځ کې د ځانګړو قواوو ویاند مجیب الرحمان امین د قرارګاه سقوط مني او د نورو جزئیاتو له ورکولو ډډه کوي.

طالبانو د پیښې د پخلي ترڅنګ ویلي؛ چې په قرارګاه کې یې ۲۰عسکر وژلي او ۲ یې هم ژوندي نیولي دي.
طالبانو ویلي چې په دې برید کې یې ۱ ټانک، ۱ رینجر، ۱۲ امریکايي ټوپک، ۵ راکټ، ۴ کلاشینکوفونه، ۱۱ پيکا ماشندار، ۴ بم افګن له زرګونه مهماتو سره نیولي دي.
طالبان داسې مهال د دې قرارګاه د نیولو خبر ورکوي چې څو ورځې وړاندې یې په دې سیمه کې ۵ امریکایي عسکر ووژل او ۲ تنه هم ټپیان وو چې په تعقیب یې امریکایانو د ملکي خلکو پرمیشت ځایونو بمبار وکړ چې تر ۲۰ ډیر ولسي وګړي، ښځې او ماشومان پکې ووژل شول.