(کابل ټکی کام ۱۳۹۶ کب ۶ فرید افغان)
د حکومت دننه د سختو اختلافاتو په درشل کې ارګ دا ځل د انرژۍ په یوه مهمه پروژه کې د انرژۍ اړوند وزیر علي احمد عثماني د یادو مراسمو په افتتاح کې له ګډون څخه منع کړی دی.
د ارګ او عثماني ترمنځ اختلافاتو هغه مهال زور واخیست کله چې د ملي امنیت د رئیس معصوم ستانکزي ورور یې د خپل سلاکار په توګه ونه مانه، عثماني له نوموړي څخه د ازموینې د اخیستلو غوښتنه کوله خو ارګ ویل چې پرته له پوښتنو دې نوموړی د عثماني مشاور وټاکل شي.
تر دې قضیې وروسته ارګ د سلب صلاحیت په موخه عثماني ولسي جرګې ته معرفي کړ چې وکیلانو ورته په غوڅ اکثریت د باور رایې ورکړې او د نوموړي پر وړاندې د ارګ دسیسه ناکامه شوه.
علی احمد عثمانی بي بي سي ته ویلي چې ټاکل شوې وه ۷ تنه د اوبو او انرژۍ وزارت له مختلفوډلو څخه د ټاپي نل لیکې د پیل په مراسمو کې ګډون وکړي خو د پروژې له پرانیستې څخه یوه ورځ وړاندې ورته د ارګ له خوا خبر ورکړل شو چې تاسو په دې مراسمو کې ګډون نه شی کولی او هیڅ کوم دلیل یې ورته نه دی ویلی.
عثماني ویلي چې نوموړي ته د ارګ دښمني مهمه نه ده، یواځې ورته دا اهمیت لري چې ټاپي افتتاح شوه او د ۵۰۰ کیلو واټ برق پروژه ومنل شوه.
ټاپي چې د طالبانو په وخت کې طرحه شوې وه له ۲۳ کلونو وروسته یې کار پیل شو.
عثماني ویلي چې د غضنفر ګروپ له ګازو څخه د بریښنا پروژه هم تر ډیره همداسې پاتې وه او ارګ اجازه نه ورکوله چې وزیر دا پروژه لاسلیک کړي، چې په خبره یې؛ بالاخره زه پر یو سفر لاړم او هغه زما معین امضا کړه.
نوموړي همداراز ویلي چې د کندهار د لمریزې بریښنا د پروژې له لاسلیک کیدلو هم د رسنیو له لارې خبر شوی دی.
عثماني زیاته کړه؛ د تدارکاتو د ملي ادارې صلاحیت تر وظیفوي فعالیت ډیر دی چې په وینا یې اوسمهال ۱۹ پلونه چې ټاکل شوې وه په افغانستان کې ورغول شي له ۱۸ میاشتو را پدیخوا یې سرنوشت نه دی څرګند او ارګ یې مخه ډب کړې ده.
دا لومړی چارواکی نه دی چې د ارګ له غیږې بې صلاحیته شړل کیږي، تر دې وړاندې هم د ارګ مهم چارواکي وروسته ترهغه چې د ارګ اړوند دډلو ټپلو فرمایشات یې نه دي منلي له دندې شړل شوي او یا هم بې صلاحیته اعلان شوي دي.
چې وروستي هغه یې د چارو د ادارې رئیس، او د ولسمشر ویاند و، چې دواړو په ارګ کې دننه له ډلو ټپلو او تعصب له امله دندې پریښې دي.
