د ملگرو ملتونو یو موټر د طالبانو له اجازې پرته له کابل نه، نه شي وتلی، د هرې نړیوالې موسسې کار او چارې د طالبانو له اجازې پرته نه شي پیل کولی، هرې ولسوالۍ ته د خیریه موسسو تگ د طالبانو له اجازې پرته امکان نه لري او هره نړیواله موسسه د حکومت نه لومړی له طالبانو سره مشوره کوي او بیا خپل فعالیت پیلوي.
دوی د حکومت په نسبت طالبانو ته ترجیح ورکوي؛ ځکه د حکومت ژمنې نړیوالې دي؛ خو په عمل کې بیا صفر وي. حکومت ډېری وخت بهرنیو پانگهوالو ته ډاډ ورکړي، چې په افغانستان کې پانگونه وکړئ؛ خو تېره اوونۍ په کندهار کې جنرال رازق هغه سوداگر وواژه، چې له امریکا نه د پانگونې په موخه کندهار ته راغلی و. حکومت دغه ژمنه هم هوايي شوه او له دې وروسته به هېڅ افغان او بهرنی پانگهوال زړه ښه نه کړي، چې په افغانستان کې پانگونه وکړي.
تېر کال د ترکمنستان او افغانستان ترمنځ د ټاپي د لومړیو کارونو امنیت طالبانو نیولی وو او د دواړو هېوادونو چارواکي بې غمه هغه ځای ته ولاړل او د نل لیکې سیمه یې له نږدې ولیده. ترکمنستان د ټاپي په اړه له حکومت ډېرې خبرې به له طالبانو سره کړې وي او د هغوی له اجازې پرته هېڅکله هم دغه پروژه نه پرانیستل کېده. ځکه ترکمنستان پوهېږي، چې دغه نل لیکه د طالبانو په سیمه کې تېریږي او که چېرته دوی اجازه نه وی ورکړی، نو دغه پروژه به څو کاله نوره هم ځنډېدلی وی.
د تېرې جمعې په ورځ د ټاپي پروژې پرانیسته وشوه. طالبانو په خپره کړې اعلامیه کې له دې پروژې بشپړ ملاتړ اعلان کړ. د طالبانو له اعلامیې وروسته بېلابېل غبرگونونه وو. ځینو د طالبانو دغه کار وستایه؛ خو ځینو عًقده منو بیا ویل، چې طالبانو ځکه د ټاپي څخه ملاتړ اعلان کړ، چې د پاکستان گټه پکې ده؛ خو دې ته یې پام نه و، چې د دغې پروژې بنسټ اصلاً د طالبانو په وخت کې کېښودل شو او شل کاله وروسته یې پرانیسته وشوه.
د ټاپي پروژې پر مټ د ترکمنستان غاز د افغانستان له لارې پاکستان او هندوستان ته لېږدول کېږي. دغه نل لیکه د هرات، نیمروز او فراه ولایتونو کې تېریږي او دغه ولایتونه هغه سیمې دي، چې طالبان پرې بشپړ حضور لري؛ نو د طالبانو له اجازې پرته د ټاپي پیل کول له امکانه لرې خبره وه/ ده.
طالبانو له دې وړاندې په هېواد کې د ټولو ټولگټو پروژو څخه ملاتړ اعلان کړی وو. اوسمهال چې کومې لویې پروژې روانې دي، دا ډېرې د طالبانو تر واک لاندې سیمو کې تېرېږي او هېڅ شرکت د طالبانو له لاسلیک پرته د دوی په سیمه کې کار کولو ته زړه نه ښه کوي.
اوس هم د ډېرو پروژو ساتنه او څارنه طالبان کوي او د حکومت په پرتله د طالبانو کارونه ډېر شفاف او له درغلیو پاک وي؛ ځکه طالبان په پروژو کې ښه کار او کیفیت ته لومړیتوب ورکوي؛ خو حکومتي چارواکي بیا یوازې د خلکو په سترگو کې خاورې اچوي او پیسې په جېبونو منډي. په تېرو څو کلونو کې داسې پروژې حکومت پرانیستلې، چې یوه اوونۍ وروسته یې هر څه له منځه تللي وو.
له ټاپي ملاتړ د طالبانو مسوولیت وو، چې دغه مسوولیت یې په خورا ښه شکل سره تر سره کړ؛ ځکه طالبان هم افغانان دي او په افغانستان کې د اسلامي نظام راوستل، ازادۍ او پر ځان بسیا افغانستان لپاره مبارزه کوي.
عُقده یان تل هر کار ته د منفي لیدلوري گوري او دوی په ژوند کې مثبت کار نه کوي او نه مثبت نظر لري. که طالبان وغواړي په سبا د دې پروژې مخه نیولی شي؛ خو نه د طالبانو سینه د دوی پر وړاندې ډېره پراخه ده.
ټاپي د ټول هېواد پروژه ده او گټه به یې ټولو هېوادوالو ته رسېږي. د دې پروژې په بریالیتوب کې باید ټولې خواوې پوره اخلاص وکړي او پرېنږدي، چې دغه پروژه د امریکايي گټو قرباني شي؛ ځکه له دې پروژې امریکا ته هېڅ گټه نه رسېږي او امریکا هېڅکله داسې کارونو ته اجازه نه ورکوي.
