(کابل ټکی کام ۱۳۹۶ کب ۲۴ فرید افغان)
د فاریاب ولایت ځایي خلک وایي چې طالبانو د دې ولایت په بلچراغ ولسوالۍ کې هم ګڼې پوستې او پراخې سیمې نيولې.
په دې ولسوالۍ کې د ولسي پاڅونوالو قوماندان دادالله چې په سیمه کې په قوماندان“دادي“ شهرت لري وايي؛طالبانو ورڅخه د “ارچتو“ لویه سیمه چې تر ۱۰۰۰ ډیر کورونه پکې میشت دي، نيولې او د دوی ځواکونو یې له یادې سیمې ايستلي.
د فارياب دولايتي شورا مرستيال صبغت الله سېلاب هم مني چې طالبانو د ارچتو سیمه د اربکیانو د ټولو پوستو تر سقوط وروسته نیولې او خبرداری یې ورکړی چې ښایي دا سیمه د دې ولسوالۍ د سقوط لامل هم وګرځي.
طالبانو په خپله ویبپاڼه “الامارة“ د یادې سیمې د نیولو پخلی کړی او ويلي یې دي چې؛ د ارچتو ټوله سیمه چې په ۱۲۰۰ کورنیو مشتمله وه، د ۳ قرارګاؤ او ۱۲ پوستو په شمول په بشپړه توګه تر خپل واک لاندې راوستلې.
طالبانو ویلي؛ چې په دې بریدونو کې ۵ محلي پولیس ژوبل او دوه وژل شوي.
طالبانو خبر ورکړی؛ چې د دوی ملګرو ته په دې تهاجمي عملیاتو کې هیڅ زیان نه دی رسیدلی.
باید وویل شي چې تر دې څو ګړۍ وړاندې طالبانو د همدي ولایت په پښتونکوټ ولسوالۍ کې هم څو پراخې سیمې ونيولې او د ۵ پوستو په ګډون یوې قرارګاه ته سقوط وکړ.
