(کابل ټکی کام، ۱۳۹۶، کب ۲۶) تېره شپه ګډو ځواکونو د ننګرهار ولايت په چپرهار ولسوالۍ کې عمليات کړي چې پر مهال يې نهه ملکيان وژل شوي دي.
د چپرهار يوه اوسېدونکي کابل ټکی کام ته وويل، ګډو ځواکونو د يادې ولسوالۍ مربوط د هدياخېلو او مندرخېلو په کليو کې چاپه وهلې او د عملياتو پر مهال يې نهه تنه هغه ملکيان وژلي چې بلچې ورسره وې او د شپې يې په خپلو پټو اوبه لګولې.
ځايي سرچينې وايي، کله چې ولسي خلکو د وژل شويو ملکيانو جنازې د اعتراض په ډول د چپرهار ولسوالۍ ته وړلې په دغې ولسوالۍ کې ناستو عسکرو په اعتراض کوونکو ډزې کړي چې پر مهال يې څو تنه وژل شوي او يو شمير نور ټپيان دي.
يوې باوري سرچينې رسنيو ته ويلي، په دې پېښو کې ټول نهه ملکيان وژل شوي دي.
وژل شوي کسان دوه د ماڼو د کلي، يو د ګراتک او شپږ د مندرخيلو د کلي اوسېدونکي دي.
اوس مهال سلګونه کسانو د چپرهار ولسوالۍ خواته اعتراضيه لاريون کړی او په عملياتو کې د وژل شويو کسانو جسدونه يې هم له ځان سره لېږدولي دي.
د ننګرهار د والي وياند عطاء الله خوګياڼی په چپرهار ولسوالۍ کې د تېرې شپې عمليات تاييدوي خو د ملکي مرګ ژوبلې په اړه يې معلومات نه دي ورکړي.
نوموړی وايي، په دې اړه به وروسته له رسنيو سره معلومات شريک کړي.
دا لومړی ځل نه دی چې په شپنيو عملياتو کې ملکي کسان په نښه کېږي، بلکې تر دې مخکې هم د ګډو ځواکونو په عملياتو کې او بمباريو کې ملکي خلکو ته مرګ ژوبله اوشتې ده، چې په اړه يې حکومتي چارواکو يواځې د پلټنو ژمنې کړي خو د عاملينو په اړه هيڅ اقدام نه دی کړی.
