سوريه: غوطه کې له تېرو درې اوونيو راهيسې ۹۰۰ ملکيان وژل شوي
(کابل ټکی کام، ۱۳۹۶، کب ۲۶) د راپورونو له مخې د سوريې په عفرين او غوطه سيمه کې لا هم د ترکيې او د روسيې ځواکونو په مرسته د سوري ځواکونو عمليات روان دي چې له کبله يې زرګونه کسان نورو سيمو ته کډه شوي او سلګونه نور وژل شوي دي.
په برتانيا کې د سوريې د بشري حقونو د څار ډله وايي، پرون د کفربطنا په سيمه کې په بمبارۍ کې د شپږو ماشومانو په ګډون شپږڅلوېښت مليکان وژل شوي دي.
يادې سرچينې په خپلو وروستیو راپورونو کې ويلي، په غوطه سيمه کې له تېرو درې اوونيو راهيسې د روسيې او سوري ځواکونو په هوايي بريدونو کې نهه سوه ملکيانو خپل ژوند له لاسه ورکړی دی.
ملګرو ملتونو ويلي، د سختو بمباريو او جګړو له کبله له غوطې سيمې شپاړلس زره او له عفرين سيمې پنځوس زره کسان وتلي دي.
د سوريې په عفرين کې ترکي ځواکونو د کرد وسله والو پر ضد عمليات پيل کړي او پر غوطه سيمه د روسي ځواکونو په ملتيا سوري ځواکونه عمليات کوي.
د روسيې دفاع وزات ويلي، له پرون راهيسې له ختيځې غوطې دوه زره کسان وتلي خو په ملګرو ملتونو کې د سوريې سفير بشارالجعفري وايي يواځې وړمه ورځ له ختيځې غوطې څلوېښت زره کسان وتلي دي.
په سوريه کې ختيځه غوطه د وسله والو او حکومتي ځواکونو د جګړې لومړۍ کرښه بلل کېږي.
د تېرې فبرورۍ مياشتې په وروستيو کې د ملګرو ملتونو امنيت شورا د سوريې په غوطه سيمه کې د اوربند يوه هوکړه لاسليک کړه خو روسيې او د سوريې حکومتي ځواکونو اوربند مات کړ او په سيمه کې يې خپلو عملياتو ته دوام ورکړ.
