(کابل ټکی کام، ۱۳۹۷، وری ۲) نن سهار د زابل- کندهار پر لويه لاره د شهرصفا ولسوالۍ په مربوطاتو کې د يوې ترافيکې پېښې له کبله اوو کسانو ته مرګ ژوبله اوښتې ده.
ځايي سرچينې وايي، پېښه د ټانکر او سراچې موټر د ټکر له امله رامنځته شوې ده، په ترڅ کې يې څلور تنه مړه شوي او درې تنه نور سخت ټپيان دي.
ټپيان د تداوۍ لپاره روغتون ته وړل شوي دي خو ويل کېږي چې روغتيايي حالت يې ښه نه دی.
دا په داسې حال کې ده، چې تېره ورځ هم د کابل- سمنګان په لويه لاره د يوې ترافیکې پېښې له کبله څلور تنو خپل ژوند له لاسه ورکړی و.
په هېواد کې ډیری ترافيکي پېښې د نا مسلکې موټروانانو د بې احتياطۍ او د سړکونو د خرابوالي له کبله رامنځته کېږي.
