ننګرهار: د ځانګړو ځواکونو په عملياتو کې ملکي وګړي وژل شوي
(کابل ټکی کام، ۱۳۹۷، وری ۷) له تېرې شپې راهيسې د ملي امنيت ځانګړو ځواکونو د ننګرهار ولايت په شيرزادو ولسوالۍ کې عملیات پيل کړي چې پر مهال يې ولسي خلکو ته مرګ ژوبله اوښتې ده.
د شيرزادو ولسوالۍ يو تن اوسېدونکي محمد نعيم کابل ټکی کام ته وويل، د ملي امنيت ځانګړو ځواکونو له تيرې شپې راهيسې د يادې ولسوالۍ مربوط د طوطو په سیمه کې عمليات پيل کړي چې لا هم دوام لري.
د نعيم په خبره، د عملياتو په ترڅ کې د يادې سيمې دوه تنه بزګران چې پر اوبو لګولو بوخت و وژل شوي دي.
نوموړی وايي، وژل شوي کسان حفيظ الله د سيد حسن استاد زوی او ناصر خان د لالک زوی دواړه د ملي امنيت ځواکونو په ډزو وژل شوي دي.
د شيرزادو ولسوالۍ امنيتي سرچينې په طوطو کې د ځانګړو ځواکونو عمليات تاييدوي وايي سيمه کې د طالبانو پر خلاف د ځانګړو ځواکونو دپلټنې عمليات لا هم جريان لري.
ويل کېږي، ځانګړو ځواکونو د ځينو کورونو دروازې په بمونو الوزولي چې له کبله يې يو شمير ملکي خلک ټپيان شوي او خلکو ته يې مالي زيان هم اړولی دی.
