(کابل ټکی کام، ۱۳۹۷، وری ۷) تېره ورځ د یمن حوثي شيعه وسله والو د سعودي عربستان پر رياض او ځينو نورو ښارونو د توغنديو بريد وکړ خو توغندي يې د سعودي د هوايي دفاعي ځواک له خوا شنډ شول او د شنډ شويو توغنديو ټوټې پر يوه کور پريوتې يو تن يې وواژه او دوه نور ټپيان شول.
پر سعودي له بريد وروسته د دغې هېواد امنيتي مسئولينو ايران ته د پوځي ځواب ورکولو خبرداری ورکړی دی.
په يمن کې د سعودي په مشرۍ د عرب ټلوالې وياند جنرال ترکي ملکي په رياض کې خبريالانو ته د حوثي وسله والو تازه بريدونه د جګړې يو خطرناک اړخ بللی او زياته کړې يې ده ښايي سعودي عربستان په مناسب ځای کې ايران ته پوځي ځواب ورکړي.
نوموړي وويل، پر سعودي عربستان د حوثي ياغيانو تازه بريد دا په ډاګه کوي چې ايران لا هم د وسله والو ملاتړ کوي
سعودی تور پورې کوي چې ایران په يمن کې حوثي ياغيانو ته پرمختللي توغندي، وسلې ورکوي او په پوځي برخه کې د هغوی ملاتړ کوي.
په یمن کې حوثي وسلوالو ويلي، په دې بريدونو کې يې د ریاض هوايي ډګر په ګډون څو ځانګړي ځایونه په نښه کړي وو.
په عين حال کې د یمن حوثي مليشو ګواښ کړی که د سعودي عربستان په مشرۍ عرب ټلواله په يمن کې د دوی پر وسله والو خپلو بريدونو ته دوام ورکړي، دوی به پر سعودي عربستان خپل بريدونه نور هم ډېر کړي.
