(کابل ټکی کام ۱۳۹۷ وری ۹ فرید افغان)
د ملي یووالي د حکومت د اجرایه ریاست وایي ، چې طالبان باید د سوله غوښتونکو پرلتیانو وړاندیز ته مثبت ځواب ووایي.
د دې ریاست ویاند جاوید فیصل وایي؛ طالبان باید دځوانانو غوښتنې ومني،خپلې وسلې حکومت ته وسپاري او سولې ته ځان تیار کړي.
طالبانو که څه هم د هلمند د پرلت ځوانانو او میرمنو دې غوښتنې ته مثبت ځواب ویلی او سولې ته یې کامل چمتوالی ښودلی خو ویلي یې دي چې که دا خلک رښتیا هم د سولې غوښتنې اراده لري خپل لاریونونه دې د امریکایي بیسونو مخې ته وکړي او له هغوی دې وغواړي چې خپل اشغال ته دپای ټکی کیږدي.
طالبانو ویلي؛ دوی د مجبوریت له کبله جګړې ته رادانګلي چې هیواد او ولسونه یې د امریکایي نیواکګرو له خوا اشغال دي او لاریوانوال باید دستونزې جرړې ته توجه وکړي.
طالبانو همداراز ویلي ( جدي اندیښنه لري چي دښمني کړي به ستاسو په نوم بده استفاده وکړي اوکه خدای مه کړه بیا څه پيښ شول مسئولیت به يې ستاسو په غاړه وي، ځکه تاسو پوهیږئ چې موږ په جګړه کې یو، د مکار دښمن له مختلفو دسیسو سره مخ یو او اړ کیږو چې د دسیسو د شنډولو لپاره په جدي اقدام هم لاس پوري کړو.)
خو د پرلت ځوانانو بیا د طالبانو ځواب مایوسه کونکی بللی او د اعتصاب پریکړه یې کړې .
دوی ویلي چې له حکومت یې هم غوښتي و، تر څو خپل تعرضي بریدونه ودروي او له طالبانو یې هم غوښتل خو داچې طالبانو ورته بل شرط وړاندې کړ دوی یې مایوسه کړي.
دوی د امریکایانو بیسونو ته له ورتګ څخه انکار کوي خو وایي چې خپل اعتراض به جاري ساتي.
د دې بهیر مشر اقبال خیبر وایي ؛ موږ به د دولت ځواب ته هم په تمه اوسو او بیا به پریکړه کوو.
د هلمند دوالي ویاند عمر ځواک وایي چې پولیس به معترضینو امنیت ساتي او زیاتوي چې د لاریونوالو د غوښتنې ټکي به د ولایت مقام په یوه غونډه کې وڅیړي.
د یادونې وړ ده چې په ټولنیزو رسنیو کې هم دې لاریون ګڼ غبرګونونه له ځانه سره درلودل چې ډیری یې د حکومت له خوا پلان شوی اقدام بولي
