(کابل ټکی کام، ۱۳۹۷، وری ۱۴) په افغانستان کې د ملګرو ملتونو سياسي دفتر يوناما ويلي، چې د کندوز په پېښه کې د ملکي تلفاتو د اوښتو په اړه يې پلټنې پي کړي دي.
یوناما ويلي، د بشري حقونو يوه ډله سيمې ته رسېدلې او د پېښې په اړه يې څارنې او پلټنې پي کړي دي.
په عين حال کې سيمه ييزو طالبانو کابل ټکی کام ته وويل، هغه خبريالان يا رسنۍ چې غواړي د پرونۍ پېښې د ملکي تلفاتو په اړه پلټنې او راپورونه برابر کړي کولی شي چې په ډاډه زړه سيمې ته ورشي.
طالبان وايي، په لارو او د پېښې په ځای کې د دوی له لوري لازم امنيتي تدابير نيول شوي دي.
که څه هم د کورنيو چارو وزارت او د کوندوز امنيتي چارواکي ادعا کوي چې د دشت ارچي ولسوالۍ په پروني بريد کې تر شل کسانو پورې وسله وال طالبان وژل شوي خو د شمشاد، اريانا نيوز، کابل نيوز او يو شمير نورو رسنيو او خواله رسنيو راپورونه ښيي چې بمبارۍ کې يواځې ملکي خلکو ته مرګ ژوبله اوښتې ده.
له پېښې څو شيبې وروسته د دشت ارچي ولسوال ويلي و چې د دستاربندۍ په غونډې په بريد کې سل کسان وژل شوي او شاوخوا يونيم سل نور ټپيان دي چې ټول يې عام وګړي دي، خو وروستي راپورونه په پېښه کې د ټپيانو او وژل شويو شمېره لوړه ښيي.
په وژل شوي کسانو کې ډيری يې د مدرسې نوي فارغېدونکي کوچني طالبان، ملايان او د هغوی خپلوان او دوستان دي.
