آصف الله آصفي
دومره عجیبه ده چې انسان د حیرانتیا په دریاب کې ډوبوي، ډاکټر نجیب چې په څرګنده کمونست، خادست او د خپل ملت سفاک قاتل و، خو بیا یې هم خپلو نظامیانو ته فرمان صادر کړی و چې د عملیاتو پر مهال باید له هغه ځایه له برید په کلکه ډډه وشي چې په کوم ځای کې ملکي خلک وي په ځانګړې توګه چې اسلامي مقدسات وجود ولري.
نجیب هم دا کار د عقیدې په موخه نه کاوه بلکې په دې موخه چې د خلکو د پاڅون څپه غښتلي کوي او د ده حکومت ته خطر لا زیاتولای شي.
خو سړی حیران دې مسلمانانو ته شي، چې له یوې مخې ځانونه مسلمانان هم بولې، او د اسلامیت او دین ادعاوې هم کوي او پر پخواني جهاد افتخار هم کوي او په څنګ کې یې پخواني مجاهدین هم راغونډ دي اسلامي او جهادي تنظیمونه یې په خوا کې په شد او مد د اسلام او جهاد په اړه څرګندونې هم کوي، خو بیا هم خپلو نظامیانو ته دا توصیه قدرې هم نه کوي چې له هغه ځایه له برید ډډه وکړي په کوم ځای کی چې ملکي انسانان او یا مقدسات موجود وي.
او د ډیر تأسف ځای بیا دادی چې په کندز کې پر کوچنیو قاریانو له برید وروسته سره له دې د نړۍ ټولو مسلمانانو دغه برید وغانده، په افغانستان کې دننه هم ګوندونو او سترو بې شمیره شخصیاتو وغانده، ځایی خلکو بلا استثناء شاهدي ورکړه چې دغلته وسله والو طالبانو هیڅ وجود نه درلود، د کندز وکیلانو د تلویزیونو له لاري ټول ملت ته وضاحت ورکړ چې بمباري پر دستار بندۍ شوې او هیڅ ډول مسلحو طالبانو وجود نه درلود، خو بیا هم د امریکا په کونجاړه شخوند وهونکي لا هم چُپه خوله دي، نه یواځې دا چې د دې برید غندنه نه کوي، د وژل شویو خلکو سره تعزیت هم نه کوي، په اړه یې اقدام هم نه کوي، بلکې برعکس د دستاربندۍ پر دغه مجلس تور هم پورې کوي چې دا دستار بندي نه وي او د وسله والو طالبانو ستره غونډه وه او د جنګ لپاره یې مانورونه تر سره کول.
حال دا چې د حکومت له سترو وظیفو څخه یوه وظیفه داده چې د خلکو د سر او مال او ناموس ساتنه وکړي، دا حکومت ساتنه خو بیخي نه کوی بلکې برعکس پخپله یې هم وژني او سربیره پرې تورونه هم لګوي.
نو ځکه باید ووایو چې اتل او شهید روزونکیه ملته! خو اوس مهال مظلوم او مقهور ملته! همغه الله دې مل شه چې د کوم الله لپاره مو د دوه ملیونه شهیدانو قرباني ورکړې ده.
