د کورنیو چارو وزارت ۲۰قوماندانان او لوړپوړي چارواکي له دندو ګوښه کوي
(کابل ټکی کام ۱۳۹۷ وری ۲۱)
د کورنیو چارو وزارت وایي؛ چې د وظیفوي غفلت له امله په مختلفو ولایتونو کې د پولیسو ۲۰ قوماندانان او لوړپوړي چارواکي له دندو څخه لرې کوي.
د کورنیو چارو د وزارت مرستیال ویاند نصرت رحیمي رسنیو ته ویلي؛د کورنیو چارو د وزارت رهبري د شفافیت هوډ کړی چې دا کسان د فساد، وظیفوي غفلت او نورو مختلفو لاملونو له کبله له دندو څخه لرې کړي.
نوموړی وایي؛ دا اصلاحات د ریاستونو په کچه رامنځته شوي چې په وینا یې هر درۍ میاشتې وروسته تطبیقیږي.
د یادونې وړ ده چې د ملي دفاع وزارت هم ټولو پخوانیو جنرالانو ته د تقاعد موده لنډه کړې او تر اوسه یې لسګونه جنرالان تقاعد ته اړ کړي.
د کابل ښاریان دا ښه ګام بولي خو په دې شرط چې په نویو کسانو کې شایسته سالاري او ښه کاري وړتیا موجوده وي.
دا په داسې حال کې ده چې د کورنیو چارو وزارت شاوخوا میاشت وړاندې د کابل د مختلفو حوزو لپاره نوي آمران هم وټاکل.
