(کابل ټکی کام، ۱۳۹۷، غویی ۵) نن سهار مهال د هېواد په ترټولو لويه پوځي اډه بګرام توغندي لګېدلي، چې له کبله يې ځاني او مالي تاوانونه اړولي دي.
سيمې ته نږدې اوسېدونکي وايي، توغندي د هوايي ډګر په داخل کې لګېدلي او دوی ليدلي چې له ځينو سيمو يې لوګي پورته کېدل.
د بګرام هوايي ډګر ته نږدې امنيتي سرچينې وايي، په بريد کې بهرنيانو ته زيان اوښتی خو په اړه يې کره معلومات نه دي ورکړي.
طالبانو د بريد مسئوليت منلی رسنيو ته يې په لېږلې خبرپاڼې کې ويلي، چې دغه بريد يې د (خندق) په نوم د نويو پيل کړيو عملياتو په ترڅ کې ترسره کړی دی.
طالبان وايي: توغندي د بګرام په هوايي ډګر کې په ټاکل شويو هدفونو لګېدلي او بهرنيو ځواکونو ته يې تلفات اړولي دي.
د يادونې ده، چې طالبانو نن د چهارشنبې په ورځ د (خندق) په نوم د نوي کال پسرلني عمليات پيل کړل او د هېواد په بېلابېلو ولايتونو کې يې خپلو پلويانو ته امر کړی چې په بهرنيو او داخلي عسکرو بريدونه وکړي.
