(کابل ټکی کام، ۱۳۹۷، غویی ۱۱) د امريکا څخه خپرېدونکې واشنګټن پوست ورځپاڼې په يوه مطلب کې ليکلي چې ټرمپ غواړي د افغانستان جګړه پای ته ورسوي.
واشنګټن پوسټ ورځپاڼې ته د امريکا د مشرانو جرګې غړي رنډ پاول ويلي، چې ټرمپ ورته په خصوصي خبرو کې وويل چې له افغانستانه د خپلو پوځيانو پر ويستلو غور کوي.
د پاول په خبره، د امريکا ولسمشر ټرمپ افغانستان ته په اشاره وويل: (په عمومي ډول غواړي له دې دوزخ څخه ځانونه وباسي).
د پاول په باور، دی فکر کوي ولسمشر ټرمپ غواړي له دې وروسته د افغانستان شخړې ته د پای ټکی کېږدي.
تر اوسه معلومه نه ده چې ولسمشر ټرمپ په دې خبره کې څومره جدي دی، نوموړي ولسمشرۍ ته د کاندېدو پر مهال ويلي و که ولسمشر شي له افغانستانه به ټول امريکايي پوځيان وباسي.
خو له ولسمشرۍ وروسته د ټرمپ دريز په ناڅاپي ډول بدل شو او افغانستان ته يې د نورو پوځيانو د راستولو پريکړه وکړه.
اوس مهال په افغانستان کې شاخوا اوولس زره امريکايي پوځيان ميشت دي چې د افغان ځواکونو د روزنې، سلا مشورو ورکولو سربيره وخت ناوخت له هغوی سره په شپنيو چاپو، عملياتو او هوايي بريدونو کې برخه اخلي.
