سرلیکنه
دفاع وزارت هڅې کوي چې د افغان پوځ شمېر نور هم زیات کړي څو په هېواد کې د شته بهرنیو پوځونو ترڅنګ د حکومت د مخالفینو په مقابل کې د افغان پوځ مقاومت پیاوړی کړي. خو د تمې پر خلاف، ورځ په ورځ د افغان امنیتي پوځونو شمېر کمېږي.
په روان کال کې چې د افغان پوځ او مخالفینو تر منځ د جګړو په اړه کوم راپورونه ورکړل شوي، یادونه پکې شوې چې په تېرو ۱۷ کلونو کې په دومره لږ وخت کې دومره بمبار په افغانستان کې نه و شوی لکه د روان زېږدیز کال په دریو میاشتو کې چې هوايي ځواکونو وکړ. د حکومت مخالف وسله وال، ملګي وګړي او آن په کندز کې دیني مدرسه یې هم بمبار کړه.
افغان حکومت هڅه کوي چې په بمبار او عملیاتو د طالبانو مخ ونیسي او په یو شمېر ولایاتو کې د طالبانو په واک کې ولسوالۍ بیا له طالبانو ونیسي. خو په امنیتي پولیسو او پوځ کې ۱۱٪ کموالي افغان حکومت او امریکایي چارواکي اندېښمن کړي دي.
د افغانستان لپاره د امریکا د څار ادارې (سیګار) لخوا په خپور شوي راپور کې ویل شوي، د افغانستان د امنیتي ځواکونو شمېر ۱۱٪ کم شوی دی. یادې ادارې ویلي چې دمخه د ټولو قواؤ شمېر٣٣۴ زره ښودل شوی و، خو اوس ٢٩٠ زره پاتې دي، او د ځواکونو مورال هم راټیټ شوی دی.
افغان دفاع وزارت د سیګار راپور رد کړی، وايي چې د موجوده امنیتي پولیسو شمېر یې کم ښودلی. خو د افغانستان یو شمېر شنونکو بیا هم د سیګار پر راپور نیوکه کړې چې په ولسوالیو کې اربکیان یې هم په پولیسو کې شمېرلي دي؛ که د اربکیانو شمېر ترې کم کړل شي، نو دا مهال به په افغانستان کې د امنیتي ځواکونو شمېر ۲۵۰ زرو ته راټیټ شي، چې له دندو د پولیسو تېښته به افغان حکومت نور هم اندېښمن کړي.
د سیګار د راپور پر اساس، افغانستان ۴٠٧ ولسوالی لري، پر شاوخوا شپیتو ولسوالیو طالبان واکمن دي. په ٥٦ سلنه، یعني ٢٣٠ ولسوالیو حکومت حاکمیت لري او په نورو نږدې سلو ولسوالیو کې دواړه لوري نفوذ لري او د جگړې تر تهدید لاندې دي.
په همدې تر تهدید لاندې ولسوالیو کې پولیس له دندو تښتي. څه دندې پرېږدی کورونو ته ځي، او څه د طالبانو نفوذي پولیس دي، چې د خپلو ملګرو له وژلو وروسته سره له وسلو طالبانو ته تسلیمېږي.
که څه هم دفاع وزارت په اعلامیه کې ویلي په فاریاب، کندز، بغلان، ننګرهار، لغمان، کاپیسا، غزني، خوست، لوګر، پکتیا، کندهار، ارزګان، زابل، بلخ، تخار، بدخشان، او هلمند کې یې عملیات ترسره کړي؛ خو بیا یې هم اندېښنه څرګنده کړې، اعتراف یې کړی، چې په هېوا کې شل وسله والې ډلې فعالیت لري.
د افغانستان د بیارغونې لپاره د امریکا د سر مفتش اداره، سیګار، وایي چې په پوځ او پولیسو کې د نویو افغان افسرانو شاملېدلو سره سره، د افغان پوځ په لیکو کې د امنیتي پولیسو شمېر کې یوولس سلنه کموالی د اندېښنې وړ دی.
د افغان چارو شنونکي وايي چې په لیرو پرتو ولسوالیو کې له طالبانو سره د مقابلې پر مهال امنیتي پوځونو ته په خپل وخت تجهیزات نه رسول، په امنیتي پولیسو کې د طالبانو د نفوذ زیاتوالی او له امله یې په پوستو کې د خپلو پولیسو ملګرو وژل او طالبانو ته تسلیمېدل، د امنیتي پولیسو په نشه یي توکو روږدېدل، په میاشتو میاشتو پولیسو ته معاش او خوراکي مواد نه رسېدل؛ هغه څه دي چې، د سیګار په وینا، د امنیتي پولیسو په لیکو کې یې یوولس سلنه کموالی راوستی. امکان شته دا کموالی شل سلنې او تر دې نورهم زیات شي.
