(کابل ټکی کام، ۱۳۹۷، غویی ۱۵) نن ماښام د اتو بجو په شاوخوا کې د کندهار ولايت په سپين بولدک ولسوالۍ کې د ياد ولايت د امنيې قومندان جنرال رازق پر کور وسله وال برید او چاودنه شوې چې له کبله يې پوليسو ته مرګ ژوبله اوښتې ده.
د جنرال رازق مرستيال غورځنګ افريدي وايي، لومړی د موټرسيکل په واسطه برید ترسره شو او وروسته درې تنو بريدګرو ډزې پيل کړې.
د افريدي په خبره، اوس مهال بريد پای ته رسېدلی او د درې تنو بريدګرو په ګډون دوه پوليس وژل شوي دي.
خو ځايي سرچينې وايي، په بريد کې له اتو زياتو پوليسو ته مرګ ژوبله اوښتې ده.
تر اوسه معلومه نه ده چې د بريد پر مهال جنرال رازق په خپله په کور کې شتون درلود که نه.
تر دې دمه د بريد مسئوليت چا په غاړه نه دی اخيستی خو طالبان وخت ناوخت د کندهار په ښار کې په چارواکو او دولتي منسوبينو چاودنې او وسله وال بريدونه کوي چې هغوی ته پکې مرګ ژوبله اوړي.
