فراه: په مرکز کې ۱۳ عملیاتي ځواکونه وژل شوي او د جوین ولسوالۍامنیې قوماندانۍ هم سقوط کړی

(کابل ټکی کام ۱۳۹۷ غویی ۲۱)

د فراه ولایت څخه خبرونه وایي چې وسلوالو طالبانو د دې ولایت د مرکز اړوند د رج په سیمه کې پر میشتو امنیتي ځواکونو حمله کړې.
سیمیز خبریال عبدالعزیز صفدري د ځایي چارواکو له قوله وایي چې په دې نښتو کې د عملياتي قطعې د قوماندان په ګډون ۱۳ پوليس وژل شوي دي.
پر همدې حال کې د فراه د ولایتي شورا رئیس فرید بختور وایي، تېره شپه د بالابلوک ولسوالۍ د دراهي په سیمه کي ۲۳ تنه د عامه نظم پولیس وژل سوي، درې ژوبل او پنځه تنه وسله والو طالبانو له ځان سره ژوندي وړي دي.
طالبانو هم د یوې پوستې د سقوط او ګڼو عسکرو ته د مرګ ژوبلې اړولو ادعا کړې.
بل پلو طالبانو ادعا کړې چې د جوین ولسوالۍ دامنیه قومندانۍ تعمیر یې نیولۍ او جګړه روانه ده.
د دې ولایت د ولایتي شورا غړي وایی چې که کومکي ځواکونه سیمې ته ژر ونه رسیدل ولسوالۍ به سقوط وکړي.

همداراز طالبانو خبر ورکړی چې د یاد ولایت د فراه رود ولسوالۍ کې یې هم یوه قرارګاه نیولې او یو شمیر امنیتي ځواکونو ته یې مرګ ژوبله اړولې.
ځایي چارواکي او د دفاع او کورنیو چارو وزارت ویاندویانو تر دې مهاله په دې تړاو کوم سپیناوی نه دی کړی