(کابل ټکی کام، ۱۳۹۷، غویی ۲۲) د فراه ولايتي شورا او په ولسي جرګې کې د ياد ولايت يو شمير وکيلان د دغې ولايت په امنيتي وضعيت اندېښمن دي زياتوي چې د فراه امنيت ته جدي ګواښ متوجه دی او که وضعيت همداسې دوام وکړي ښايي سقوط وکړي.
د فراه د ولايتي شورا غړې جميله امينې وايي، دوه ورځې کېږي چې په فراه کې جګړو زور اخيستی طالبانو ځينې سيمې نيولي خو د دولت له لوري ورته هيڅ پاملرنه نه کېږي.
د جميلې په خبره: “یوازې څلور پنځه ناحیي دي چې له طالبانو سره نه دي، نور زه په ډاګه وايم چې مرکزي او محلي حکومت ختم دی، ولسوالۍ یوازې په نوم دي زموږ تر ټولو باامنه ولسوالۍ همدا جوین وه چې ښه پوهئږئ د فراه امنیتي وضعیت خراب دی دا ستونزه یوه طرفه کړئ یا یې طالبانو ته پریږدئ او یا لږ تر لږه خو دوه الوتکې ورکړئ چې دایمې دلته وي.”
هغه وايي، د وړمې شپې په لاش جوين ولسوالۍ کې د بريدونو پر مهال پنځه څلوېښت عسکرو ته مرګ ژوبله اوښتې ده.
طالبانو له تېرو درې ورځو راهيسې د فراه، بالابلوک، فراه رود، جوين او یو شمير نورو ولسواليو بريدونه وکړل چې يو شمير پوځي مرکزونه او ځينې سيمې يې له دولتي ځواکونو ونيولې او لسګونه عسکرو ته مرګ ژوبله واوښته.
