د ترکي ولسمشر رجب طیب اردوغان د ترور پلان جوړ شوی
آصف الله آصفي
ترکیې استخباراتو د مختلفو سرچینو نه راپورونه ترلاسه کړي چې د بلقان هیوادونو ته د رجب طیب اردوغان د سفر پر مهال د هغه د ترور پلان جوړ شوی، پداسی حال کې چې اردوغان د خپل سفر په ترڅ کې تیره یکشنبه بوسنیا ته رسیدلی.
ترکي استخباراتو د اردوغان د ترور راپورونه په مقدونیا کې له هغو ترکانو ترلاسه کړي چې هلته میشت دي، همدا راز د غربي استخباراتو مشر د خپل سیال ترکیې استخباراتي مشر ته ورته معلومات ورکړی او ویلي یې دي چی یوه ډله ترکانو د اردوغان د ترور تیاری نیولی.
خو استخباراتي شبکو تر اوسه د اردوغان د ترور ممکنه ځای او وخت په اړه معلومات ندي ترلاسه کړي د ترکیې د شفق یني ورځپاڼې په حواله ویل شوي چې یواځې دومره معلومات ترلاسه شوي چې د هغې ډلې نه چې د اردوغان د ترور پلان لري دوه کسان يی د فتح الله ګولن ډلې پورې تړاو لري.
د یادې ورځپاڼې سرچینه وایې چې ترکي استخباراتو دا هم ویلي چې د اردوغان په ترور کې د اسرائیلو لاس هم وجود لري، او زیاته کړې یې ده چې اسرائیلو یوه ډله ترورستان سیمې ته د اردوغان د ترور په موخه استولی دی.
ورځپاڼې د نظامي تحلیلوونکې خبري ورځپاڼې (فیتیرانس توډی) په حواله لیکلي چې د امریکا اداره په دې اند ده چې د اردوغان له وژنې پرته پر ایران برید نشي کولای. او د اردوغان په وژلو به روسي ولسمشر ویلادمیر پوتین هم د سوریې د مشر بشار الاسد له ملاتړ لاس واخلي، او پر ایران به د وسلو له پیرودلو به هم لاس په سر شي خو دا کار هغه مهال شونی دی چې اردوغان ژوندی نه وي.
