(کابل ټکی کام، ۱۳۹۷، غویی ۳۱) د ملکي تلفاتو د مخینوي په موخه طالبانو په يوې خبرپاڼې کې ويلي، چې ولسي وګړي دې له پوځي، استخباراتي او حساسو ادارو څخه ځانونه ليرې وساتي.
د طالبانو د نظامي کمېسيون له لوري کابل ټکی کام ته په رالېږلې خبرپاڼې کې راغلي چې :” د اسلامي امارت مجاهدین د نړۍ په سطحه هغه څوک دي چې په نظامي عملیاتو کې فوق العاده احتیاط او داولس د سر او مال ساتنه خپله مهمه وظیفه بولي.”
د خبرپاڼې له مخې، که څه هم د بريدونو پر مهال طالبان له ډير احتياط څخه کار اخلي چې ورسره د ملکي تلفاتو کچه تر ډيرې اندازې کمه شوې خو زياتوي چې يواځينۍ سيمه (د کابل ښار) دی چې وخت ناوخت پکې ملکيانو ته مرګ ژوبله اوړي.
د طالبانو د نظامي کمېسيون د خبرپاڼې له مخې” د کابل ښار چې د اشغالګرو تر ټولو مهم مراکز او استخباراتي او پوځي ادارې په کې شتون لري او اولس وژونکو سپیشل فورس، ملي امنیت او د دښمن د نورو پوځي ادارو بې رحمه کارکوونکو اکثرو په کابل ښار کې په داسې ځایونو کې خپل دفترونه او مراکز جوړ کړي چې له اولس څخه د سپر په توګه کار اخلي.”
طالبان وايي، د ملکي وګړو وژنه يې هيڅ جهادي تګلاره کې ځای نه لري زياتوي په بريدونو کې يې يواځې خپل هدف ته تلفات اوښتي وي نو ” د کابل له ښاریانو مو غوښتنه دا ده چې د دښمن له پوځي، استخباراتي او نورو حساسو ادارو څخه ځان ليرې وساتي.”
د طالبانو نظامي کمېسيون په اخره کې ويلي، چې دوی د الخندق د عملياتو په لړ کې په دغو مرکزونو د بريدونو پلان لري او دا چې د ملکيانو د مرګ ژوبلې مخنيوی شوی وي نو له هېوادوالو يې غوښتي چې د حساسو ادارو، پوځي مرکزونو تر څنګ له تګ راتګ او هغوی ته په نږدې سيمو کې له پاتې کېدو څخه ډډه وکړي.
