ایران د فراه په جګړه کې پر یاد هېواد لګول شوي تورونه رد کړي او ویلي یې دي چې دا تورونه په ”افغانستان کې د جګړې له اصلي عواملو د خلکو د افکارو د منحرفولو“ په موخه پر ایران لګول کېږي.
د ایران د بهرنیو چارو وزارت ویاند، بهرام قاسمي، نن دوشنبه په تهران کې یوه مطبوعاتي کنفرانس ته ویلي، ”پر ښارونو د طالبانو بریدونه او بیا بېرته د دولتي ځواکونو له لوري له طالبانو د ښارونو نیول کومه نوې خبره نه ده، او دا د تهران او کابل له ښو اړیکو سره هیڅ ارتباط نه لري.“
قاسمي زیاته کړې، ”امریکايي قومندانان چې په افغانستان کې له پراخ نظامي شتون او د زرګونو بې ګناه افغانانو د وینو تویولو سره سره په افغانستان کې د امنیت په راوستلو او ساتلو کې پاتې راغلي دي، هڅه کوي پر ایران له طالبانو سره د مرستې په تورونو لګولو سره د افغانستان د خلکو ذهنونه د جګړې له واقعي عواملو منحرف کړي.“
بهرام قاسمي ویلي، ”هغه څرګندونې چې د پردیو او یرغلګرو د رضایت په موخه کېږي، د افغانستان او ایران له دوستانه اړیکو سره هیڅ مطابقت نه لري.“
د نوموړي په خبره، د اوبو د ستونزې د حل په اړه د دواړو دولتونو ترمنځ خبرې له ډیپلوماټیکو لارې روانې دي، او ”د افغانستان له داخلي ستونزو سره د دې موضوع تړل هیڅ منطقي، صحیح او عقلاني اساس نه لري.“
تېره اونۍ طالبانو له دولتي ځواکونو سره تر نښتو وروسته د فراه ښار زیاتره برخې او نظامي مرکزونه ونیول، خو څو ساعته وروسته چې ښار ته نور امنیتي ځواکونه او د بمبار لپاره د بهرنیو ځواکونو الوتکې ورسېدې، طالبان له جګړې پرته پر شا شول او ښار یې پرېښود.
د شنبې په ورځ (۲۹غويی۹۷) دفاع وزیر طارق شاه بهرامي، د کورنيو چارو له وزير، د ملي امنيت له مشر او په افغانستان کې د مېشتو بهرنيو ځواکونو له قوماندان سره يو ځای فراه ته د سفر پر مهال وویل چې ”د فراه جګړه په مطلق او دقيق ډول د اوبو د مديريت جګړه ده.“
په افغانستان کې د مېشتو امريکايي او ناټو ځواکونو قوماندان، جنرال جان نيکولسن، هم ګاونډي هېوادونه د طالبانو په ملاتړ تورن کړل.
د طالبانو ویاند، ذبیح الله مجاهد، د دفاع وزیر د خبرو په غبرګون کې پر خپل ټویټر په فراه کې د لوړپوړو افغان او بهرنیو چارواکو د ناستې یو تصویر خپور کړ. په تصویر کې د مېز پر سر د امریکا تر بیرغ او د جنرال نیکولسن تر سر سرې کرښې را تاو کړل شوې وې.
مجاهد له تصویر سره لیکلي و: ”دښمن ادعا کړې چې د فراه جګړه د اوبو پر سر جګړه وه. ځانونه مه تېر باسئ! جګړه د اوبو پر سر نه، بلکې جګړه د دغه بیرغ او دغه کس پر سر ده. غلامانو که تاسو رښتیا افغاني احساس لرئ، نو تنها د اوبو مسئله مهمه نه ده؛ زموږ ټوله خاوره، فضا او اوبو دغو امریکایانو یرغمل کړي دي.“
د روسیې او پاکستان په ګډون وخت ناوخت د افغان او امریکايي چارواکو له لوري پر ایران هم د طالبانو د ملاتړ تورنه لګول کېږي، چې هر ځل د یادو هېوادونو له لوري رد شوي دي.
روسیه او ایران وايي چې له طالبانو سره یې اړیکې یوازې د سولې خبرو ته د هغوی د راوستلو تر حده دي.
