له امریکا او ګواتیمالا وروسته پاراګوای هېواد هم په یروشلم (قدس) کې خپل سفارت پرانیست.
د سفارت د افتتاح په مراسمو کې، چې نن دوشنبه (۲۱ می) ترسره شول، د پاراګوای ولسمشر هوراسیو کارتس او د اسراییلو لومړي وزیر بنیامین نتنیاهو ګډون کړی و.
امریکا یوه اونۍ وړاندې خپل سفارت د قدس ښار ته نقل کړ، چې د نړۍ د مسلمانانو او نړیوالو له سخت غبرګون سره مخ شوه. له امریکا وروسته گواتېمالا دویم هېواد و چې خپل سفارت یې قدس ته انتقال کړ.
د امریکا ولسمشر، ډونلډ ټرمپ، د تېر ۲۰۱۷ز کال په دسمبر میاشت کې قدس ”د اسراییلو د پایتخت“ په توګه وپېژاند او امر یې وکړ چې د امریکا سفارت له تل ابیب څخه قدس شریف ته انتقال شي. د روانې می میاشتې په ۱۴مه نېټه د امریکا سفارت عملا په قدس کې پرانیستل شو.
قدس ته د امریکا د سفارت انتقال په غزه کې د فلسطینیانو لاریونونه نور هم پسې پراخ کړل. لاریونونه د تیرې دوشنبې په ورځ اوج ته ورسېدل، او اسراییلي ځواکونو نږدې ۶۰ فلسطیني لاریونوال شهیدان کړل.
د لاریونوالو زیات تلفات د ډیپلوماټیک عکس العمل لامل شول، ترکیې د اسراییلو سفیر او کونسل جنرل له خپل هېواده وویستل او ځینو نورو اروپايي هېوادونو اسراییلي سفیران د پوښتنو ګروېږنو لپاره احضار کړل.
