(کابل ټکی کام ۱۳۹۷ غبرګولی ۱)
د پکتیا ولایت امنیتي چارواکو رسنیو ته ویلي چې طالبانو تیره شپه د ګردیز اړوند دابراهیم خیلو سیمه کې یوه پوسته له ټولو مهماتو او امنیتي پرسونل سره یوځای نیولې ده.
د پکتيا امنيه قوماندانۍ يو افسر پژواک ته ویلي؛ د طالبانو په برید کې ۶ پولیس وژل شوي ۵ طالبانو له ځانه سره ژوندي بیولي او د یو هاموي ټانګ او یوه رینجر په ګډون ګڼ مهمات دطالبانو لاس ته لویدلي دي.
د زرمت ولسوال حکيم وزيري د پېښې په تائید سره وایي چې څو تنه ټپي پولیس طالبانو ژوندي نیولي او د زرمت د مموزو کلینیک ته یې د تداوۍ په موخه انتقال کړي دي.
بلخوا بیا د ګردیز د لومړۍ حوزې آمر سمیع الله صدیقي د پوستې سقوط مني خو زیاتوي چې په دې برید کې یې ۱۲ طالبانو ته هم مرګ ژوبله اړولې.
طالبانو د پېښې پخلی کړی او خپل لوري ته یې د اوښتو تلفاتو ادعا رد کړې.
ابراهیم خیل د ګردیز ښار لویدیځ لوري ته د زرمت ګردیز په سړک پرته سیمه ده چې وخت ناوخت په کې طالبان پر دولتي ځواکونو بریدونه کوي.
