قاري خالد
هالبروک چې مړ کېده وروستۍ خبره یې دا ؤه چې طالبان په جکړه نه ماتېږي، له طالبانو سره سوله وکړئ.
دهالبروک خبرې وړاندوینې نه وي بلکې دجګړې له میدانه دیوه جنګیالي له لورې دجګړې رښتینی عکس ؤ.
دډېری امریکایانو دزړه غږ هم همدا دی خو د زړه دا حقیقي غږ په خوله راوستل مستکبرو امریکایانو ته، د امریکایي غرور او استکبار خلاف ښکاري.
له ټامي فرانکس را نیولې تر سکاټ مېلر یوه هم په طالبانو ګلونه نه دي ورولي او نه یې دطالبانو پر وړاندې له ترحم او عاطفې کار اخیستی دی. برعکس دټولو بشري او سماوي قوانینو خلاف عمل یې ورسره کړی دی.
د امریکایي زبرځواک سره جګړه او ددوی دپرمختللې ټېکنالوجۍ پر وړاندې درېدل، اوس هغسې نه دي لکه څنګ چې تر جګړې وړاندې ؤل.
تر جګړې وړاندې اټکلونه او وړاندوینې داسې وې چې ګواکې له امریکایانو سره جګړه ځان په هلاکت کې اچول دي او اسلام په هلاکت کې تر ځان اچولو منع کړې ده.
ډېری ژبه وَر او خوله وَر مفتیان او علماء هم په دې نظر ول چې د امریکایانو سره جګړه دشریعت او تعقل خلاف ده.
دوی هم ملامت نه ول؛ دوی په امریکایي تبلیغاتو خطا وتلي ول، او داسې یې انګېرله چې بې تجربې افغانان به دتجربه کارو امریکایي جنرالانو پر وړاندې خس او خاشاک ثابت شي او له ځانوژنې پرته به بل هیڅ په ګوتو ورنشي.
رښتیا هم تر جګړې وړاندې امریکانانو دخپلې جنګې ټیګنالوژۍ په اړه داسې ښکروَرې دعوې کولې چې هیچا توقع نه درلوده چې طالبان به بیا ځل سر پورته کړي.
دطالبانو یوه ویاند (ګومان کوم ملا امیرخان متقي صاحب و) همهغه مهال یوې رادیو ته په خبرو کې وویل: امریکایان درواغ وایي، دوی هیڅ نه دي او ټولې دعوې یې درواغ او جنګي چالونه دي.
ویاند زیاته کړه: دکاپیسا په استقامت مو یو ټانګ درولی دی، څلور ځله امریکایي الوتکو بمبار په وکړ اما ټانګ یې نه دی ویشتلی.
امریکایي تبلیغات دومره توند ول چې په ټولو خلکو یې دډار خپسه کښېنولې وه او چا له وېرې سوڼ هم نه کاوه.
دا منلی شوی حقیقت دی چې جګړه کې تر وسله والې جګړې تبلیغاتي جګړه زیات اهمیت لري. او همدا لامل و چې په پیل کې امریکایانو تمام تبلیغاتي ماشینونه په کار اچولي و.
امریکایانو دتبلیغاتي جګړې لپاره دکرایه ډنډورچیانو ځانګړي ګروپونه جوړ کړي و.
هر یوه ته یې میاشتني زر او اته سوه ډالر ورکول او په کابل او ولایاتو کې یې ددوی دمعاشاتو او کاري ارزیابي لپاره د انټرنیوز په نوم ادارې فعالې کړې وې.
اوس چې نیکولسن له جګړې مایوس دی او دګټلو امید یې ختم دی، امریکایانو د سکاټ مېلر لپاره بیا ځل درواغجن جګړه ئیز تبلیغات پیل کړي دي.
هو! له دې انکار نشي کیدلای چې مېلر ظالم او وحشي نه دی، اما دا ثابته خبره ده چې جګړه په وحشت او ظلم نه ګټل کیږي. برعکس وحشت او مظالم ولسونو ته دپاڅون او انقلاب لاره ورښیي.
نیکولسن هم دلته داسې بشري جنایات ترسره کړي چې بېلګه یې تاریخ په تېر کې نه لري. لاس ته راوړنه یې څه شوه؟
شرمېدلې تېښته او بس!
سکاټ مېلر به هم خپل زور ووهي، قتلونه به وکړي، وحشتونه به وکړي خو په بدل کې به د امریکایانو په خلاف لا زیات نفرتونه وزېږوي، تر دې هاخوا هیڅ نفع نشي تر لاسه کولای.
کومو ملتونو چې د ازادۍ بیرغونه پورته کړي دي، هغوی نه سکاټ مات کړي دي او نه سکاډ او کروز. څومره چې وژل شوي هومره یې لارویان زیات شوی دي، هیڅ کله په وحشت او ظلم نه دي ختم شوي او نه وحشتونو له زوره غورځولې دي.
دلته داعش هم کټ مټ دغربیانو په څېر تر وسله والې جګړې وړاندې تبلیغاتي جګړه پیل کړه او دظالمانه وژنو او ترور ویډیویي فلمونه یې خپاره کړه، دداعش تبلیغات دومره زهرجن ول چې خلکو یې له وېرې ډک کورونه پرېښودل، مالونه او شتمنۍ یې دواعشو چور کړي خو چې کله دواعش عملاً میداني شوه، ولسونو ولیدل چې له خپل سیوري هم وېرېږي او تر جګړې یې ډنډوره زیاته ده، په بیړه یې ددواعشو خلاف ټوپکونه پورته کړه او دتبلیغاتي جګړې له خپسې ووتل.
لنډه دا چې په میدان دمات دښمن ټول تمرکز تبلیغاتي جګړې ته اوښتی دی او وروستۍ هڅې یې دادي چې په تبلیغاتو طالبان او ولسونه ووېروي، ترڅو ولس له طالب بیل کړي. کشران طالبان سکاټ او توغندي ته په درواغجنو او اضافي تبلیغاتو له صفونو وتلو ته وهڅوي او دوی ته دبایللې جګړې په پای کې میدان تش پاته شي.
