(کابل ټکی کام، ۱۳۹۷، غبرګولی ۵) د پکتيا ولايت په احمدخيلو ولسوالۍ کې د نومليکنې مرکز د ځای د انتخاب پر سر دوو تنو نوماندانوشخړه کړې چې وروسته د دواړو نوماندانو قومونه هم راپاڅاېدلي او نښته رامنځه شوې ده.
سیمه ييزې سرچینې وایي، لومړي وار کې شخړه ولسي جرګې ته د دوو احتمالي نوماندانو د پلویانو تر منځ رامنځته شوې او وروسته بيا مسله د هغوی قبيلو ته تللې او وسله واله نښته رامنځته شوې ده.
سرچينې د امنيتي ستونزو له کبله د يادو نوماندانو نومونه نه دي ذکر کړي.
د پکتيا د والي وياند عبدالله حسرت وايي پېښه تېره ورځ د احمد خېلو ولسوالۍ د سټيو په سيمه کې د ماماخېل او بادين خېل قبېلو تر منځ پرون ماذيګر رامنځته شوې چې په ترڅ کې يې دوه تنه وژل شوي او يو بل ټپي دی.
څه موده مخکې له سيمې څخه راپورونه ورکول شوي و چې د دغه ولايت نوماندانو مدني فعالان او ځوانان يو د بل دښمنان کړي او په سوشل ميډيا کې له يوبل پسې خبرې کوي.
په عين حال کې د خوست د والي وياند طالب منګل د دغې ولايت په مندوزيو ولسوالۍ کې د نوم ليکنې پر يوه مرکز د بريد خبر ورکړی چې په وينا يې يو پوليس او يو د ملي اردو عسکر پکې وژل شوي دي.
